خليكم من الدوة الزايدة بتع الكثير من الوهميين اللي يدوو بالتنمية البشرية وغيرها
تبي التنمية الحقانية امشي دير شبكة علاقات قوية في العالم وبجنبك تونس فيها مؤتمر 10-14. 6. 2019 جايين كبرى الشركات من تويتر وفيسبوك وسنابشات وبيتكلموا على الحريات الرقمية… rightscon .org
تبي تطور حياتك قدامك موقع udemy يعطي في عدد مش شوي من الكورسات المجانية بالانجليزي والعربي وفي برومو كود يعطيك كورس حقه 200$ يعطيه لك مجاني.
كمية كتب pdf المتاحة للقراءة غير طبيعية.
تمرن ودير رياضة وحط السماعات وافتح podcast تعليمي او ثقافي وتعلم المزيد
تبي العلاقات عندك الفيسبوك وتويتر في عدد من الليبيين اللي فوق من العاديين وراح يفيدوك بدون مقابل..
دير رقم تلفون رسمي ودير بزنيس كارد ودير ايميل gmail, hotmail رسمي ليك وشخصي وابدا في الحياة…
الموضوع مش صعب… افتح صفحة بمشروعك على فيسبوك ولو انت مدون صوري او اي شي، افتح مدونة صور وامشي لشركة العنكبوت الليبي واشري نطاق ly ومساحة 100 دينار ويكون عندك فيه موقع واسمك ودون صورك ولا خواطرك ولا افكارك ولا مشاريعك ولا افتح قناة على اليوتيوب وتوكل على الله واعرف كيف يديروا في فيدوات حتى بالموبايل وكون vlog وخليك cool..
انا داير مدونة من اربع شهور فيها ستة مقالات وصلت 4000 زائر من جميع انحاء العالم www . amin . ly
دير واتساب whatsapp ودير فايبر viber ودير telegram على رقم تلفونك وافتح اكونت linkedin وعبي cv بتعك
تعلم طرق في google search
تعلم كيف تبني موقع مدونة wordpress
تعلم من قنوات في يوتيوب كيف تصحح حياتك مثلا على سبيل المثال لا الحصر “قناة الدحيح.. قناة اسبيتالية.. قناة ايجيكولوجي… قناة اكل وشرب… قناة فويس تيك… وغيرها هلبة من القنوات القوية في الطب والصحة والنشاط والدراسة
اتفرج على tedx وفيدوهات ted راح تتعلم بشكل عالي منها في وقت مضغوط
موقع Coursera كذلك يوفر كورسات تعليمية
تفرج على وثائقيات الحرب العالمية الثانية BBC planet Earth I, Ii, blue sea…. Our plante وغيرها
قوي انجليزيتك ونفرج الافلام مرة بترجمة بالعربي ومرة بترجمة بالانجليزي ومرة من غير ترجمة…..
دير الاساسيات وابدا انطلق…
زمان وتوا ماشي بقاعدة، اذا اردت ان تبني عاليا فاحفر عميقا
كورسات التقنية متوفرة كورسات الطبخ متوفرة كورسات الفنون متوفرة
نعرف صديق داير قناة ليبية فريدة وقوية على يوتيوب اسمها “كوجينا” ورائعة جدا… ويقدر اليوم يطلع منها دولارات.
صديق اخر داير “مدونة التطبيقات” مستواه معاش محلي… اصبح عالمي وما تستغربوا يوم شركة ابل تقوله تعال نبوك فري تجي وتقعد عندنا تقييم المنتج او التطبيق
ما تقدرش دير هذا كله شوف انت متمكن في شنو ديره… وفر البيئة المناسبة ليك…..
يوجد ما يقارب 300 قروب على فيسبوك الخاص بالبيع والشراء… دير اسم في السوق وكون رائد فيما تقوم… لانك بصراحة تستحق احسن من انك تبع اخبار الحروب والقتل والتدمير…
عندي صديق من خمس سنوات بدا في كورسات سيسكو اليوم واصل مستوى ثقيل جدا في سيسكو عنده كذا CCNA وتقريبا زوز CCNP ولما سيسكوا يشوفوا في ليبيا يقولوله تعال انت نبوك.. تعال نهدرزوا عليك فقط. لانك تستحق.
افتح راديو او بودكاست على الانترنت وانشر افكار جديدة وفكر فيما وراء المدرسة والجامعة…. يوجد التعيلم الذاتي ويوجد تدريب ذاتي
امشي لمصر او تونس وافتح حساب وخليه قانوني ونظيف واصدر وفيزا وعبي فيها 1000$ واعرف العمولات واستخدمها لدفع الالكتروني لاحتياجاتك فقط وما تدير جو الدولار وبيع وشراء.
خلي الناس الكويسة جنبك ودير بيهم اجمل نادي اجمل قروب اصدقاء راح تفيدوا بعض وترتقوا… فوت جو الخبث والمكائد… الحياة ما تراجي حد… آلهى في عمرك ودير اللي يفيدك لقدام..
اثمن شيء عندك اليوم هو الوقت
ابدا من توا ورتب شغلك وحياتك.. ابدا من تلفونك المحمول وشفرة او شفرتين ليبيانا والمدار وانترنت وتعلم الجديد.. خلي اسلوبك جميل مع الكل علشان تكسب ود الناس وتكون صادق. استثمر فلوسك في نفسك في تعليم وثقافة وفكر.. مافيش اعلى منك استثمار مستقبلي… كل دينار او دولار حطيته استثمار في نفسي ما مشيش خسارة وما تقول ماعنديش انا الاول ماكنش عندي شي 2015 واليوم الحمد لله مسيطر على حياتي
العالم اليوم خلف شاشتك اللي تقرا منها…. تقدر تنظم حياتك وتقدر تشده كر وفر وضربونا وتم الدعس… بس العمر ما يراجيكش…. يوم تلقى روحك 45 سنة اعرف ان الرصيد الحالي لا يكفي لاجراء هذه العمليات.
فكر صح واحسبها صح ونفذها صح
وحتى العام القادم هذا امين صالح يرسل لكم اجمل تحية.
وخلوا معنوياتكم فوووووووق ✌🏻✌🏻✌🏻✌🏻
#Amin_Salih
- المنشور يتم تعديل واضافة افكار جديدة كل فترة بسيطة احرص على المشاهدة والمشاركة save، وارجوا عدم النقل وعدم النسخ وكتابة منقول، والتعديل حتى لا يتم تشتيت القارئ في اكثر من مكان.. وحتى يتم اثراء المقال في مكان واحد.