كان ما خبطاتك الحياة ما تحاول تتكلم عن تجارب

كان ما انخبطت خبطة ماكنة لعند تقعمزك في الحوش ثلاثة شهور تتفرج على الافلام وتمشي تصرف مدخراتك قبل ما تفكر في الخطوة اللي بعدها ما تتكلم

كان ماتوجعت وجعة كبيرة من القريب قبل البعيد وحسيتها غدر وخيانة وتعودت عليهم وعلى زيادتهم ما تتكلم لانك مزال ما تعلمت

كان ما عرفت تتعامل مع الاحداث وتتأقلم عليها ما تتكلم

كان قاعد بعد عشر سنين من ما يسمى اللعبة السياسية “تصفق وتهلل ودحرناهم وتم الدعس وقصفناهم وحررناها ودمرناها ويجب الافصاح عن مصيره” ومزال مستمر فسامحني انت لا تعلمت ولا راح تتعلم ولا في وقت مزالك انك تتعلم

كان ما وجعك الضي اللي يفصل عليك 12 ساعة وما فكرت في حل شامل كامل سواء بالهجرة او السفرة او مولد او حل ضخم لحياتك… فانت تستهلك في وقتك وما تعلمت والشتاء اسوا والصيف اللي بعده اسوا

كان قاعد تقولي التعيين والمرتب ونراجي معاشي… فنقولك برافوا انت صح بس في اللي اصح اللي يكسر في الحجر ويطلع من قلبه الذهب… وبالمناسبة يكسر في الحجر بسنونه وظوافره وعظامه

كان بعد كلامي هذا كله ما وصلاتك الرسالة وقاعد مستمر… فصدقني مزالك هلبة وانت تخبط في الحيوط…

منشور بعنوان

Fight forever

كان معاكم امين صالح

28-06-2019