السلام عليكم ورحمة الله وبركاته
صباح الخير

اليوم نبي نتكلم على الحوار الفاعل البناء والذي ينتج عنه اي فعل او نتيجة…
لاحظت في الاعوام الاخيرة اننا فقدنا بوصلة الحوار اساسا… فلم يعد الحوار موجها او ذو فائدة انما هو عراك بكلمات او افعال وهذا ما لامسته من فئة ليست بالقليلة والتي تزيد عن 10,000 شخص على فيسبوك في مجموعة مشاكل وحلول الانترنت في ليبيا ضمن نقاشي وحواري على #شركات_الاتصالات_الليبية
على سبيل المثال لا الحصر:
—————
نفتح موضوع ونتكلم عن قوة ليبيانا في السوشيال نطلع في التعليقات اجير ومرتزق ويدفعولي فلوس ومدعوم وهلبة كلام فارغ

نفتح حوار عن تغطية ليبيانا يخشلي حد ويقولي خيرك ما تتكلم على المدار

ننتقد المدار ونتكلم عن مشاكلها بالتفصيل نطلع حاقد وناقم ومريض نفسي ونبي نشتغل ومرفوض وكل الشتائم من الموظفين

نشكر ونقول #شكرا_المدار_الجديد نطلع بعت القضية ودبل شفرة وانسان متناقض وغير متزن وجماعة المدار يخشلك يقولك شفت كيف ركعناها واللي ما يقرع لتريس وتم الدعس

نطلب ونرسل رسالة تمديد تحميل ليلي من #ليبيا_للاتصالات_والتقنية يقول وخيرك ما تتكلم عن التغطية..

نسكت وما نتكلم على بعض المواضيع من اجل سلامتي يخشولي جماعة الشركات تكلم يا خواف..

نتكلم بهدوء يعلق المحقق كونان ويقولك انت قلت هذا من اجل هذا وبناءا على كذا وانت دبل شفرة وانت غاياتك واغراضك ومآربك ولدي وثائق… عليه انت المجرم 🤪🤪🤪

يرسلي خاص ويقولي انت ضاحبهم كلمهم يفتحولي تغطية… طيب والله ما ضاحب واحد ولا نعرف فيها اي حد في اي مركز قرار وغير مؤمن بالواسطة ونمشيلهم مع الباب ونتكلم بادب ونتصل علي ارقامهم… شن ندير… انا مش وزير تطلب مني تغطية في اخر الدنيا وفوق من هكي نقولك لا اعلم تشتمني او تقولي صحيت يا….

—————

علما اني غطيت كل النقاط اللي ذكرت في التعليقات من تغطية وتطبيقات ومزايا وعيوب ونقد ورسائل وشكاوي واجراءات قانونية عبر اكثر من 200 منشور في سنة وحدة

الفكرة من اللي درته وقاعد ندير فيه اني نخاطب فيهم باحترام وادب وشجاعة واطالب بحقي وألتمس لهم كل الاعذار ونرفق في الحل وخلاصة النقاش اللي ممكن يجيب فايدة للجميع… افراد ومشتركين وموظفين وشركات ووطن..

انا مش بتع شعارات ودعايات ولا غرضي لا شهرة ولا وظيفة ولا اي حاجة… الغرض الصالح العام..
ولا انا بخبث بعض الموظفين والناس اللي يقعد يأول في كلامي كيف ما يريحه… انا معاش عندي شيء الا كتاباتي وافكاري وخدمتي الشخصية فقط
متفائل ونحاول ندير تغيير بشوي افكار عندي وطرق ونعلموا الاطفال والكبار اساليب التقنية والحوار والأمن التقني.. والوعي التقني وكيف المجتمع يطلب حقه بدون تكسير وتحريض وعدوان وفوضى
نعلم ونتعلم كيف نطلبوا الأمور برقي وموضوعية وحياد… مش عندي مشكلة مع #المدار_الجديد… بعد اسبوع او اسبوعين تلقاني خشيتها معزز مكرم وفي من يسمعني.. وفوق من يسمعني ينفذ من اجل الجمهور ويصير تغيير…

انا مش مستني حد يتكلم باسمي سواء امين او عبدالعزيز او مروان او وليد علشان نطلب حقي…
حقي نطلبه ويوم نلقى روحي فاضي نطلب حق الشعب…

كانت هذه خاطرة لي في موضوع حواري في المجتمع
تحياتي واعتذر ان وجدت اخطاء املائية 🤓🤓🤓

هنا امين صالح