منشور المعنويات فوووق ✌🏻️✌🏻️✌🏻️

مهما ضغطت عليك الحياة في ليبيا وقعدت بلا كهرباء وانترنت ومواصلات وبنزينة وسبل رفاهية الحياة خلي معنوياتك فوووق لانها لازم تقعد في القمة.. وتقعد فوووق جدا

لو فاضي وتقرا منشوري ابدا نظم حياتك :
حول الناس مزعجة من حياتك وخلي ناس مفيدة وخلي unfriend او الغاء الصداقة ياخذ مجراه
دير علاقات مع ناس مفيدة
ما تلتفت للكارهين والشامتين والحاقدين والشاتمين لان المرحلة اللي وصلت فيها ان يشتموك هي تلك المرحلة اللي انت فيها على حق… المهم ان يكونوا هؤلاء الناس ما يمثلوا شيء في الحياة الا عندهم وكالة مكافحة الوهم… وانت صاحب الاخبار يوميا

😍😍😍
وخلي نبدأ في المفيد والمهم:
غير خلفية نقالك
نظم ملفات نقالك
خلي عندك رصيد ليبيانا ومدار على الاقل باستمرار 10 دينار وخلي الشفرتين باسمك لانك من اليوم راح تنظم حياتك “ومن هنا نبدأ”
عبي محفظتك في سداد ونزل تطبيق سداد علشان يبدا خيارك في المدفوعات الالكترونية
افتح ايميل باسمك على gmail,hotmail,icloud. واحفظ باسورداتك
لو انت مهني جدا وعارف تستخدم LinkedIn عبيه بمعلومات حقيقية عنك وانشر فيه معلوماتك المهنية فقط.
دير ملف اسمه favorites في جهازك وحط فيه كل اوراقك الثبوتية: رقم وطني صورة ملونة من بطاقتك وشهادة ميلادك وجواز سفرك وصورتك الشخصية اللي مخزنة PSD وهي صيغة يعرفوها المصورين ومعامل التصوير
كل هذه الملفات والاوراق الثبوتية خلي منها نسخة على Google Drive او icloud Drive او حتى الاثنين
حط صورة حلوة على الاكونتات الرسمية ليك على السوشيال ميديا
احذف اي app تطبيق زايد عن حاجتك على الموبايل وركز قدر الامكان على خدمات جوجل ومايكروسوفت
كانك تحب التصوير تعلم Lightroom or snapseed
خلي في نقال تطبيق يخص حساب مصاريفك لان الفرق بين الغني والفقير هو حساب المصاريف والتكاليف
خلي عندك حساب رسمي برقم هاتفك على Telegram و viber. و whatsapp
خليك كوووول cool على Instagram مع اني ضعيف قيه جدا
لو عندك صور عائلية جميلة طلعها على ورق ما تكلف شيء… الصورة على ورق التصوير ممكن 1 دينار بس الذكرى بتعها اكثر من 1000 دينار 😍
قلل من استخدام التطبيقات entertainment واستخدم تطبيقات productivity اكثر
مدام العمر قدامك فوت وامسح الصفحات السياسية والتحريضية والعدوانية ولو عندك وقت دير report على اي صفحة تنشر القتل والدم والتحريض والحرب وانشر السلام والكلام الطيب وخلي وجودك مفيد.
خلي المادة بتعك مفيدة وتنشر كل سعادة في كل مكان.
تعلم شيء مفيد على الانترنت.
في شهادات من Hp life مش عاديات تعلمك كل soft skills وكذلك في شهادة مجانية من جوجل تعلم التسويق…
تم منشوري هذا وامشي اقراهم… مش صعبات
خلي عنوان حياتك هو اسمك وايميلك ورقم تلفونك…وخلي اسمك رنان لا ينسى مهما صار وبالخير
اي صورة او screenahot او فيديو زايد عليك احذفه ولو الموبايل معبي فضيه على قرص SSD خارجي
ابدا حياتك على نظيف
في موقع اسمه about عبي فيه شخصيتك وسيرتك
شوف احسن مصرف حواليك وافتح فيه وتبي خدمات مالية ارقى افتح في تونس…
مدام الدولة مش معدلة علينا خلي نعدلوا على ارواحنا شوية وكان ما وقفت لنفسك ومجتمعك ما تستنى حد يوقفلهم

لو انت متمكن في حاجة وتبي تنشرها فيديو افتح قناة على يوتيوب وتعلم وافهم وكل الناس بدات صغيرة وكبرت

الشهرة مش غاية… لو كانت الشهرة غايتك فاعتقد ما عندك ما دير بيها الا الناس بتقعد تشتم فيك بدون غاية بل هي وسيلة للوصول لاكبر عدد من الناس لنشر رسالة او قضية

ما تخلي العالم يضغط عليك… انت اللي اضغط على العالم

ودير شير بالك صاحبك ولا حد توصله كلمة من هذي الكلمات

خلي الاصلاح والتغيير والتحسن شعارك

وباستمرار نقول فيها… خلوا معنوياتكم فووووووق ✌🏻️✌🏻️✌🏻️
✌🏻️

#newlife_libya