لا تيأس ان الله معنا

صعبت علينا الدنيا وضاقت وممكن نحن نعيش أسوا ايام التقدم البشري,, وانت كليبي اصعب واحد في المجرة: حرب وكورونا وماء وكهرباء وغلاء وقلة سيولة

ما عليك في الكرة الارضية والحضارة ولا تجزع ولا تقلق. توا يجعل له الله مخرجا.

نعتبروا ان العداد صفّر ونبدوا من جديد كلنا,

بتسأل شن نقدر ندير توا,,

تقدر دير المستحيل في فترة الحجر الصحي

ابدأ بنفسك وانطلق,, حسن صحتك ودير رياضة كل يوم عشر دقائق وثاني يوم عشرين دقيقة لعند توصل اليوم 12 على ساعتين مشي او جري او هرولة, علشان تتحفز اكثر نزل تطبيق google fit او شغل تطبيق health

اشرب اميه على قد ما تقدر,, كول فيتامين,, كول صحي,

تميت صباح الرياضة المنوع

ابدا في حياتك الجديدة, اليوم اغلب شركات العالم اعطت كورسات مجانية من على موبايلك تتعلمهم,, ادخل موقع ادراك وتعلم موقع udemy فيه مئات الكورسات ولما تم الكورس تاخذ شهادة حضور,, موقع coursera,

قضي ساعتين يوميا ولو تقدر توصلهم لدوام رسمي يومي 8 ساعات تعليم وقراءة ومشاهدة قنوات مفيدة على يوتيوب تكون انت بعد نهاية الحظر من اقوى الناس في العالم, خليك من كلام شن تقدر دير. وكان غيرك اشطر. “الاشطر اليوم حاصل ويطلب في اطباء ومهندسين وفنيين من كل بلاد العالم”

وصلنا اليوم لمرحلة معاش حد ينفعك الا جهدك,,صحتك وعقلك,,

استعد لمعركتك,, هذي حياتك وما تتنازل عنها بسهولة,,

عالي قيمتك في الكرة الارضية,, تبين من هذه الازمة ان لا سكان امريكا ولا اوروبا اقوى منك لو تتعلم صح،، هما عندهم فرصة في بلدهم وضاعت والله اعلم تتكررلهم او لا,,بس انت الفرصة ذهبية ليك توا,, Keep moving forward

صلح حياتك,, حسن صحتك عيش كويس وكول كويس,,

حافظ على صلواتك وعبادتك,, التزم النصح الصحي,

لو تلفونك فيه فوضى صور رتبهم احذف الزايد, فيه فوضى ارقام رتبهم,, ابدأ اليوم,, نظف سيارتك,, ازرع زرعة,, رتب الحوش,, وعلشان ما تقول مجحف في حقك ونقول كلام من الفراغ,, تفرج على افلام ومسلسلات عربي اجنبي. حقك تستمتع,, ولما تبي تستمتع استمتع صح.

شوف في ثلاث هرومونات:

1- اندورفين : هذا هرمون ناتج عن الحركة والرياضة والضحك والقراءة ومعاش يخليك متكسر لما تنوض من النوم او مضايق,

2- دوبامين: هرمون ينتج من الإنجاز من اي مهمة تمها.

ويرتبط حتى هوا بالشغف والشكر والتقدير والمكافاة.

3- سيرتونين: وهو مرتبط بالعطاء ومساعدة الغير واسعادهم.

يعني بحاجات بسيطة ديرها في يومك بتولي من اسعد واجمل واقوى الناس.

خلي وقتك مفيد,, قروبات الحروب والمعارك والجريمة والخراب مش ليك,, اطلع منهم,, مش راح تقدم لك اي فائد، واللي زيك مكانه افضل وما تخافش في مكان يتسع للجميع مهما قالولك الحياة مش عادلة والكبار قالولك عشنا ايام صعبة,, قوله احنا اللي ايامنا سود ✌🏻️😁 ومزال مكملين,, زيدله كلمة لا تحزن ان الله معنا

اول مرة من 70 سنة العالم يتوقف,, كلها وقفت,, انت ما توقف,, وكان العالم خسر ترليونات،، انت ما تخسر نفسك،

تعجبني فلسفة نظام التشغيل لينكس Linux يوصل مرحلة معاش ينهار وهي مرحلة النواة Kernel تقعد تشغل وبقية النظام منهار وبشكل لا يصدق تقدر تبني النظام من جديد ✌🏻️

ولا تنسى اعداء كلامي واللي بيقولك هذا وهم وكلام فارغ وماليشي معنى قوله باهي, وفوته، هذي المجموعة تكون سعيدة لما تحطمك,,

اعتبره اليوم 0 وديرلها موسيقى او فيديو سميه New Start,, صدقني نكلم فيك من غادي,, وانت وانا نستحقوا افضل من هكي

وخلي معنوياتك فوووووووق ✌🏻️✌🏻️✌🏻️ مهما ضاقت الظروف

شكر خاص لكل من قام بالمشاركة Share

امين صالح

14-4-20208:00 صباح يوم جديد