بنشرح اليوم على off peak duration او وقت انعدام الذروة

الاشهر الماضية وممكن ليا ستة شهور نسمع في ناس تقول شن استفدنا منه التحميل الليلي وشن فايدته ونبو باقات وعروض نهارية وهذا كلام فاضي و #ليبيانا و #المدار_الجديد و #LTT يدعون لفساد المجتمع وتسهيرهم الخ من الكلام اللي تعرفوه وشفتوه وفي ناس اقتنعت بيه

نبي نقولك ونشرحلك موضوع اوقات انخفاض الحمل او عدم وجود ذروة وهي وقت الشبكة تكون فاضية لا يوجد active users ولا يوجد تحميل عنيف على الشبكة… ولنفترض ان سعة شبكة المدار على سبيل المثال لا الحقيقة: 40Gbps وان في النهار السحب من الشبكة يوصل 35Gbps ووقت المغرب يوصل الى 39Gbps وبعدها يبدا يخف… هوا هنا معاش يقدر يخفض اسعار اكثر من اللي موجود لان بيولي زي نظام العرض والطلب… لما يكون السعر رخيص راح يكون الطلب عالي ويسبب ان الشبكة توصل لمرحلة الازدحام او التشبع.. سوء الخدمة والاستقرار

توا عندك نقطة ثانية وبحكم احنا شعب اغلبنا نرقدوا في الليل الساعة 1 او 2 فبحلول الساعة 3 راح يكون استهلاك الشبكة اقل من 5Gbps واللي هوا اقل من 12% من الشبكة…

هنا تتعاون الادارة التجارية مع الادارة الفنية لخفض الحمل النهاري او ترحيله عن طريق عروض مغرية جدا في الليل فيما يسمى نت بصبح او الباقة العملاقة او التحميل الليلي المجاني.. وهنا تكون الشركة ربحت كذا نقطة وهي:
تخفيف الحمل النهاري اللي مخلي الشبكة مزدحمة والسرعة ميتة
تعبئة حمل ليلي الشركة دافعة حقه
زيادة فرصة تخفيض السعر في النهار
امكانية وجود ارباح تجارية ليلية
المحافظةعلى استقرار الشبكة
وغيرها مما لا يتسع المجال لذكرها

توا لما جت ازمة كورونا العالم كله تقربع واصبح كل الوقت هوا وقت peak or climax او ذروة او قمة استهلاك…. الشركات ما عندها الا توقف موضوعات التحميل الليلي المجاني او المفتوح علشان يفهموا شن صاير من ارقام في شبكتهم على NOC واماكن تكدس الزبائن والاستهلاك الضخم…

ليبيانا فاهمه النظام بحكم شبكتها اوسع من المدار في الاشتراكات والانترنت دارت لك التحميل من 7 الصبح لعند 2 الظهر وهذا فن مش كل حد يجيده…
يعني توا LTT اللي دايره تحميل مجاني من 3 الى 10 بتطيح في مطب اللي هوا السرعة ميتة.. من 3- لعند 6نظرا لتكدس في هذه الفترة

الموضوع عالمي وحاولت نشرحلكم الفكرة من off peak وليش ليبيانا او المدار او اورانج او الشركات الخاصة يديروا فيه وحسب ما سمعت في هلبة دول وقفوا التحميل unlimited وفي اللي نقص السرعة بعد جائحة كورونا… فهذا امر طبيعي جدا…

شكرا جزيلا ليكم وكان معاكم امين صالح
كل عام وانتم بخير

شركاتالاتصالاتالليبية

وهذا الكلام اللي مكاتب اعلام وتسويق الشركات ما تعرف تقوله ومش متعلمة نشر الوعي لجمهور الزبائن