كل مرة في بلد مثل تونس 🇹🇳 ومصر 🇪🇬 نركب في تاكسي او نلتقى باحد الاخوة العرب من اي دولة اخرى مثل الاخوة الجزائريين 🇩🇿 والسودنيين 🇸🇩 او العراقيين 🇮🇶 او المغاربة 🇲🇦 وغيرهم
يحكي لي كيف كان عايش في ليبيا في فترة الثمانينات والتسعينيات
مثل يقولي ركبت في طائرة من بنغازي الى طرابلس بقيمة 17.5 دينار
ويحكي لي مشيت لبراك الشاطي وتوقعت نلقى بحر لقيتها منطقة في الصحراء 😁😁
ولا يقولي سبها ليش موجودة… انتم ساكنين الصحراء بجد 😂😂😂 وبتتحملوا
ويحكي لي بلدكم كانت ومازالت بلاد عز واهلكم اهل كرم… الله يمسي الحاج محمد… كلينا في حوشه اكلة شعبية عمرنا ما كلينها اسمها بازين.. صارلنا بعدها مغص وثقيلة… نقوله غير انت ما رفست كويس 😂😂
ولا واحد قالي خشيت مطعم وقلت له شن عندك سندويتشات قالي عندي “دحي” “وتن”😳… قال طلبت تن…فسأله صاحب المطعم تبي هريسة 😂😂😂… رد عليه شنو تحطوا في بسبوسة على التن..
المهم استمتع بالفطور وقال عمري ما كليت تن طبيعي زي اللي كليته في ليبيا..
اخر قال ابن عمي قالي تعال لليبيا على التلفون الارضي مشيت ركبت سيارة اجرة ووصلت لمنطقة دحمان.. وما عرفت ابن عمي وين.. خدمت زواق لفترة لعند تلاقيت صدفة مع ابن عمي..
واحد مصري يحكي وقال الجبل عندهم فتات مسقي غير طبيعي… سالته قلتله كيف وصلت ليبيا قالي مشيت لليبيا مرتين… مرة بالطيارة وكان سعرها 55 دينار وهذي ارخص واخر مرة ركبت فيها طيارة ومرة عن طريق مصر تركيا – تركيا ليبيا كان عندكم سفينة بحرية اسمها طليطلة وقعدنا ثمان ايام في البحر..😭😭😭
استاذ مصري كان يقري فينا رياضيات الله يذكر بالخير… قالي خدمت ودرت عيلة وتزوجت مرتين وقريت ابنائي في ليبيا
.. ليبيا بلد خير على كل حد زارها… كنا نقروا بلاش وعايشين زينا زي الليبين.. بس قالي انتم كان عندكم كتيب الجمعية…😂😂😂 يعطوا فيكم في سكر باربعة دينار وهو خمسين كيلو 😂😂😂
وكثيرة هي المواقف اللي يحكوا فيها اكل ومواد منزلية وطيران وسكن وخدمة ورزق واستقرار… واللي يسافر في الليل الخ من كنا عايشين..
اجتمع الجميع على كلمة… مش كان تعقلوا وتهدوا الامور وتستقر البلاد وتعيشوا في سلام… عندكم الموارد وشعبكم شوية وارضكم كبيرة وانتم اهل كرم واخلاق وناس تربت كويس وتتعلموا في احسن تعليم وبرا وداخل…
ينتهي هذا الحوار الذي كان سعيد في اوله بكلمات ربي يهدي العباد ويصلح الحال..😢
انه حواري وحوار كل الناس اللي طلعت من ليبيا او في ليبيا احتكت باخوتنا العرب والبلدان المغاربية..
ربي يهدي
احكي لنا على قصة قد حكيت لك في تاكسي او مع حد من الاخوة العرب
امين صالح
23-02-2020