نقول نفطر وتوا نبدا ندير في شغلي والمهام اللي معلقة.
بعد الفطور نتعب ونرتخى لمدة ساعتين وهكي وصلنا 10 تخش تتكى. خلال ساعات تقلب فيسبوك وانستقرام ويوتيوب فيديوات مضحك تارة… توعية على كورونا وخبر جديد… يعترضك نتوفيكشن صاحبك دارلك love على ستوري الانستقرام اللي فيها صورة المبطن.. تنقزله تقوله صح فطورك.

طبعا المجموعة كلها دايرة قروب اسمه قروب مكافحة الكساد. تخش ترسلهم عشرين نكتة باردة وهما يردوا عليك بصحكات باردة😂😂😂… ومشي الحال.. وكلها تقول ربي يصلح الحال… ومرة مرة تقرموا واحد ما تحبوشي

تخش تويتر تلقاهم الساعة عشرة مزال ما فطروش بحكم انك تابع في المجتمع المخملي البرجوازي الطبقي محوري وكلهم سكان امريكا وبريطانيا. تسكر وتشوفلك كم في ليبي فاتح لايف يسب في صحابه في اللايف ولا يحكي في قصة كلهم يسبوا فيه عليها… بدون اي فايدة… تسكر اللايف.. تلقى واحد يكتبلك : انتصرنا… تقوله ربي يهديك بدون ما تخش تعرف هوا مع اما طرف… 😂

تفوت على التايم لاين تلقى سوسو تبحث عن كمامات في قروب اين اجد في طرابلس، ومروان يبحث عن غلاف ايباد مع التوصيل والفاضي يذكر الله.

تنوض تفتح الثلاجة او الكوشة لانتشال بعض القطع مما تبقى من الفطور… وبين الضياع بين هنا وهناك وتقليب الشاشة على 5 قنوات في الثانية..

تلقاها الساعة 12… تجمع شتات جهد وتبداها قرمة صوتية انت وجماعتك وكان بنت هي وصاحبتها… لمدة ساعتين… لعند يجي وقت السحور.
..
تعبنا من السجن والحجر وقلة الطلوع والاكل واصبح ملاذنا شاشات هواتفنا… بقينا بدون اعمال بدون مشاغل..
هذه طريقة اضاعتنا لوقتنا في الحجر الصحي الرمضاني

حفنة من رمضان بنقال امين صالح…. معاش يكتبوا فيها بقلم😂