تحليل اعلان #ليبيانا “انت مولى النت”

الاعلان راح يكون سبب في صعود مستوى الاعلانات “فكرة انتاج نجوم تعاون قصة تسويق الخ من عوامل التسويق” ومش باب ان نفصلوا في الباب القوي اللي راح تفتحها ليبيانا واعتقد انها راح تنتهج هذا الاسلوب لعدد من الاعلانات…. الموضوع مش انيمي او صوت وقصة وانتهى.. الموضوع تسويقيا اكبر…

ما علينا من الكلام اللي فات كله.

اهم النقاط الضمنية اللي تخاطب العقل الباطن وتقعد في الذاكرة… واثرت في المتلقى بطريقة ضمنية.

1- وجود ايقونة ايتونز او ميوزيك وايقونة فيسبوك في شاشات وغيرها من الايقونات اللي الكادر ما جمعها وهذي خلت شعورين يكونوا موجودات.. ان ليبيانا فيها هلبة تطبيقات تفتحها بانترنتها وان هذا مش حصر بس على تطبيقين… يعني كلمة الخ على هيئة صورة.

2- كل الشاشات فيها زوز لامبات يشتغلوا على الدوام اخضر واحمر.. يعني انه وانت تشتغل في عالم ثاني يشتغل من طرف ليبيانا…

3- كثرة الشاشات تعبر انك موجود في datacenter او مركز خدمات انترنت فائق السرعة… واللي عنده الباقات ممكن يستحوذ على هذا كله

4- الشخصية اللي مثلها #يوسف_الجروشي واللي هي شخصية الرديف الشوارعي بتع السلاسل في صورة الخلفية والفتوه اللي ما يتفاهم… جسدت ان هذا اقوى حد في المكان وما حد يغلبه. وهي شخصية بعنوان w.w.w اي ان هوا الانترنت ذو المحتوى الثقيل

5- عزز موضوع قوة الجروشي هو حصوله درع اليوتيوب الذهبي واللي هوا شخص يوتيوبر وصل لمليون مشترك.

6- المروحة لتعزيز ان والع وما حد يكلمه وفاصل على اي حد يكلمه في ميجات… جايني تكلم فيا على 100mb و 10mb… المروحة هذي والراحة والنت ما ياخذه الا حد عنده باقة اكسترا.

7- وجود عصفور تويتر اللي يغرد مع الجروشي في اوقات الفراغ.

8- ربط مشاهدة مسلسل لاكازا دي بابيل بباقات عالية وهو فعلا علشان تشوف حلقه تبي اكثر 700MB يعني 120MB لا نبي نسمعلك ولا دهشني ولاتسمعلي وهيا تشاو تشاو وهذا ترند يطلع كل ما يجي جزء جديد… واخر جزء كان الشهر الماضي وحقق مشاهدات قياسية

9- السيدة حاطه الموبايل في وشاحها تحت الحجاب… وهذي عادة يديروا فيها السيدات والبنات الليبيات بكثرة خصوصا في قيادة السيارة…ودار tag او اشارة ان عندنا باقات يوتيوب..

10- المتليع والمحب العاشق اللي يبي يسمع اغنية هذا يعبر عن انغامي والاسقاط ان محب ومتليع جاء ممتاز جدا. وهكي وضح له ان انغامي تبي باقة خاصة مش 10MB

11- اغنية يا ميجا دوارة كانت تلميح موفق… ان زي الدنيا دوارة وكل مرة تقلب… كان ما تشترك في باقات ليبيانا الميجا دوارة.

12- واخيرا نجو “ترا خوذ الوسع”.. شبوب لابس تيشرت وهو مكتوب عليه i love libya يستنى حاط ايده في جيبه في اشارة لثقة.. واثق من نفسه وقادر يهزم اللي مرقدهم كلهم من المغرب.

13- لون الارضية كان خافته بنفسجي اشارة ضمنية الى لون هوية ليبيانا. بس مش مبهرج وواضح زي المرات الماضية.

14- البنت لما طلعت صوت طقة حذاها واضحة للي بيركز… وهذا يضيف نوع من الواقعية وفي نفس الوقت ما تخلي تركيزك يسيب الموضوع الاساسي.

15- تم الاشارة في هذا الفيديو الى كل من نيتفليكس ويوتيوب وانغامي… وفي شبوب داير تقويم اسنان الثانية 0:16 الواضح انه مزال في جزء اخر من الاعلان وراح يناقشوا تيك توك وباقات السوشيال وساوند كلاود..

لو في اضاف نسيتها او فكرة او غلطة او توضيح ممكن تضيفوها في التعليقات… اجتهاد شخصي 😎😎😎

هيا تشاو تشاو تشاووو

#شركات_الاتصالات_الليبية
#ليبيانا