متلازمة عدم التصديق
ترسخ في المجتمع الليبي اخر سنوات مفهوم جديد واساليب جديدة والواضح ان ما حد سماها خلي نسميها انا وهيover investigation او ان كل واحد يحقق في اللي ما يعرفاش ويحط فرضيات ويبني عليها فرضيات وفرضيات على الافتراضات ويقولك وجدت الحقيقة..
توا درت منشور على القوانين واهميتها في التنافسية بين #شركاتالاتصالاتالليبية ودخول الشريك الاجنبي وحفط الحقوق وحاولت نلم الموضوع من كل الجوانب.. واللي بعض منها مش من صالح الشركات
خشوا عليا ناس عندهم متلازمة عدم التصديق وقالك: “انت دافع عليهم، يا وهمي، يا موظف معاهم، وهذوم لفوا عليه، يا بتع فيصل، يا بتع لعق الاحذية، يا تبع شركة المليشيات، المرتشي، اللي يقبض مرتبه معاهم، ماعنداش طارقة، انت دافع على اللي يسرقوا في دم الشعب، وخنت دماء شهداء المقاطعة 😂” إلخ من الاتهامات اللي مش جديد اني نسمعها.
الفكرة اني حتى قاعد نسمع فيها من موظفي الشركات موظفي ليبيانا يقولك هذا عميل المدار والقابضة، وموظفي LTT يقولك هذا قابض من المدار وشركات خاصة، والمدار قالوا هذا قابض وماجور من فودافون، والقابضة يقولك هذا مبعوث من الهيئة، والهيئة تقول هذا تبع رئيس القابضة… لعند قريب نسألهم انا مين 😂😂😂😂
يا ظلام يلي ما تخفوش ربنا😂😂، حتى ايميل نرسله الى LTT طلعوني عميل ليهم. وهما كان يمسكوني يعذبوني، ماهو انا قلت لكم من اولها محايد ومش طالب منصب ولا طالب توظيف ولا تعاقد وندير في كل هذا لصالح العام وللبلاد ومجانا، مش مصدقها انت حر بس ليا سنة ونص نخدم في بلادي اكثر من هلبة ناس ومن بينهم المعلقين والموظفين مجانا.
توا نجي لرأي واللي بنشرحه لناس اللي عرفتني بعد يوم 18-2 يوم حملة مقاطعة LTT انا يا سيد نشوف للموضوع من وجهة نظر موضوعية محايدة شاملة لعدة وجهات نظر… كونه ما عجبك مش شرط اني من طرف الاخر… وحتى الشركة مرات ما يعجبه مش معناها اني من طرف المواطنين ضدهم…
شوف للموضوع باكثر شمولية:
1- شركات بلادك وتبي ترتقي بيها بالنقد الهادف البناء او بالشكر والثناء دون شتيمة او تقليل ادب والمطالبة تكون باخلاق عالية.
2- هذوا مواطنين بلادك اللي لازم توعيهم وتفهم شن صاير.
3- مكاتب الاعلام في الشركات كلها منهارة وفارغة ولا تساوي ربع دينار وتصرف مبالغ فلكية، ندير في شغلهم مجانا لان الشركات ما تعرف تفهم الناس… فانا نوصلكم في معلومات مكاتب الاعلام بطريقة افضل منهم
4- الدولة فارغة من القوانين، واخر قانون عليه القيمة وتوا يعتبر معيوب هو قانون الاتصالات عام 2010
5- القطاع فيه مشاكل تنحل بشكل علمي فني استشاري صحيح، مش عنف وفوضى وثورية وتكسير.
6- الحوار يكون بادب ورقى ومش كوني نتكلم بكلمات مؤدبة او نتكلم بتربيتي واخلاقي وبالعلم والمعرفة والتقنية معناها خالص منهم… لا هذي تربيتي، وتربيتك وضحت انك تتهم فيا بالرشوة والقبض والتوظيف.
7- اللي يتواصل معاي من الشركات، يا فاهم ومتعلم ومتربي وملم، يا اما نشوفوا اللي اعلى منه.
8- نحقق في نتائج مرضية جدا وجيدة بهذه النقاط ونستمر عليها.
كثيرة هي النقاط… ولاحظت اني درت بلوك لهلبة ناس من عموم المجتمع يسبوا فيا…” حطينا املنا فيك وتوا تشكر او وواقف في هذه النقطة معاهم” طبيعي نوقف مع الحق سواء مع الشعب ولا مع الشركة ولا مع الدولة ولا مع التقنية… مش موجود انا او غيري علشان نحقق رغباتك وهل الباقة هذي مش ماشية معاي او هذا العرض مش متفصل على مقاسك او تبي نسايرك في شتيمة
وبخصوص خيرني منقص نشاطي ضد الشركات… لان اساسا مافيش موظفين يخدموا اخر فترة الا 10-25% يعني بنرسل ايميل ونتعب فيه… بيرد عليا ماعنديش موظفين ينفذوا بسبب الحظر… يعني نضيع في مجهودي على الفارغ…قلت ندير توعية ونفهم الناس حقوقها ونديروا مسابقات ودروس #الوعيالتقنيللجميع
فربي يهدي ورجاءا مانبي ندير حظر لحد لان مش فاهم او يبي يدير عركة