كل يوم ناقز واحد يقول ضروري من شركة اتصالات اجنبية، خاصة تجي تنهي مهزلة شركات مثل #ليبيانا و #المدار_الجديد و #LTT

ترا اشرح لي كيف شركة خاصة تخش لليبيا؟
طيب جت شركة خاصة ووقعت مع ليبيا 25 سنة وكانت خدماتها اسوا من ليبيانا والمدار واسعارها اغلى من LTT ترا شن راح دير… وانت لا عندك قانون حرية المعلومات ان تصرح لك شن صاير معاها، ولا عندك قانون حماية المستهلك اللي يحميك من استغلال اي شركة او نصبها، ولا عندك قانون جرائم الكترونية في حال باعت الشركة تسيجلات المكالمات big data لأي شركة اجنبية ولا عندك قانون خصوصية البيانات الخ من القوانين.

وبعدين على اي اساس راح تجيك الشركة، على البنية التحتية الممتازة ولا الثقل السكاني اللي يفوت 30 مليون ولا المساحة المحدودة ولا امن الموظفين والمهندسين وانت اخر شركة كهرباء جت لجنزور انخطفوا موظفينها.. ولا تراخيص الوزارة اللي تكسر اي شركة اتصالات سنويا ولا تكاليف الانترنت من الدولية ولا البنية التحتية من هاتف ليبيا اللي ماشية كلها فساد ومرتبات سنوية 100 مليون دينار.
كيف بتقنع الشركة ان متوسط المرتبات في ليبيا هو 150$ في الشهر وان المواطن يدفع متوسط شهري 20$ اتصالات تقريبا، يعني اجمالي دفع الشعب على الانترنت هو 120 مليون تقريبا، ويقولك نمشي نحارب على السوق السعودي او المصري او الهندي او الاوروبي افضل واضمن.

ومن بيعطي اعتمادات تحويل فلوس من داخل لبرا وبرا لداخل وسهولة مالية اذا كانت ليبيانا والمدار والدولية ول ت ت يمرمط #مصرفليبياالمركزي بكرامتهم الارض علشان يعطيهم اعتماد..

ترا اقنع لي فودافون انها تمشي تجيب ورقة من ديوان المحاسبة علشان تقدمها للمحافظ علشان تجيب بيها بطاريات…
بلاش هذا كله… شركة اتصالات او اورانج او زين لما بتخش لليبيا.. كيف راح تتفاهم مع الشركة العامة للكهرباء… كيف راح يقعمزوا مع بعض🤯🤯🤯🤯 كيف بتقنعهم ان مافيش اساسا قوة دولة ومرات يقص الضي 3 ايام وشعب يفكك ويحرق في الابراج، وواحد داير عشرين حوش في الصحراء يطالب بضي واميه وتغطية وفتح فرع من مصرف ليبيا المركزي في قلب الصحراء ويقولك شنو خسارة فيا “انا ليبي”… كيف راح تقنع شركة اجنبية بتوصيل انترنت لمدينة مثل اوباري… هوا كشركة اجنبية يشوف فيها خسارة…

لما بتتكلموا تكلموا كلام منطق،، يخش العقل..
تبي شركات وطنية او اجنبية تدخل او تعمر طالب بدولة قوية يحكمها القانون وقوانين محدثة ودولة منعدمة الفساد… مش كل سنة نحققوا في مستوى من العشر الاوائل في الفساد والخطر وضعف الانترنت والتهالك…

اعمل لاصدار قوانين محدث… وعدل مسودات واوقف من اجل بناء دولة عادلة على الجميع…. حينها يكون لنا الحق في الضغط على الشركات من موقف قوة… ومناداة شركات خارجية من طرف دولة وحل الشركات القائمة وبيعها او ادخال شريك اجنبي الخ

شركاتالاتصالاتالليبية

وكل عام وانتم بخير