تعليق “افرح لمدينتك اللي حررناها” والشتائم في التعليقات وخيرك ما تنزل منشورات على الانتصارات، فكوني منها.
لا تعرفني وين ساكن ولا تعرفني شن شفت منها الحرب ولا الضرر اللي تعرضتله فترة طويلة منها، فتجنب العراك او الاتهام في الصفحة هذي..
الصفحة خاصة بي اولا وهي متخصصة في الوعي والعلم والترفيه والمطالبة بالحقوق وتأسيس قوانين وتشريعات وتعليم المجتمع واعتقد الكل يعرف اتجاه الصفحة..
مش مصممة علشان تتعارك فيها مع الناس او نختلفوا او نطعنوا في بعض او نخونوا بعض…. مؤسف جدا كمية المنشورات اللي شفت فيها خلاف… اعتقد
منشور فيلم الرسالة كفروا بعض
منشور الفضاء جهلوا بعض
منشور عمر المختار خونوا بعض
منشور النازحين سرقوا بعض
منشور الهلال شككوا بعض
منشور نتفليكس طعنوا في اخلاق بعض
منشور لا لتخريب الابراج شتموا بعض
منشور كورونا مرضوا بعض
وتبي نزل منشور قد يحسب انه سياسي او عسكري، الحرب وانتهت وسعيد جدا انها انتهت وتألمت جدا لما بدات وخسرنا فيها اصدقاء وناس طيبة كثيرة وخسرنا فيها ارزاق والناس خسرت فيها وضرر نفسي حاد جدا… مافيش داعي تقعد تزيد في كل هذا الألم بسوء كلمات منك…. خليك في الموضوع بكل اخلاق وادب ورقي…
مواضيع الصفحة واضحة. وما لقيت ضدي تهمة او طعن، مش لازم تختلق من عقلك طعن وطبقه.
تبي تفرح لمدينتك مش على فيسبوك امشي ابنيها وعمرها واسسها صح وما دير الغلط واعتقد ان ليا سنين ندير فيه الامر وسعيد بمدينتي في طرح الاحمال والحرب والسلم والنمو
نقطة اقلب الصفحة