في فئة جديدة بادية تكبر ونشوف فيها اخر سنتين وهي فئة اللي يقولك على اي حد مش عاجبه “هذا طالب شهرة”

ووجدتها كثيرا ممن لم يستطيعوا نقاشي في موضوع الوعي التقني والحقوق الرقمية للمواطنين والبلاغات والشكاوى ومطالب الجمهور وغيرها.

هذه الفئة اسهل حاجة عندهم يقولك في تعليق “هذا واحد طالب شهرة”، طيب كيف شققت على قلبه وعرفت مكنونات نفسه ووصفته بطالب شهرة، وشن هي الشهرة، وشن فيها مردود مالي أو نفسي، ممكن أنا ما نعرف شن فيها الشهرة من فلوس أو علاقات، بس معرفتي بأكبر كم من الناس في السلطة التنفيذية والتشريعية والإدارات الوسطى والعليا وعلاقتي بالناس مخليتني نسخر اي شهرة عندي في الخير وبدون مقابل.

هنا نقولك من الأخير الشهرة كان فيها خير فأنا حولت لناس وكان فيها شر فأنا اللي تلقيته.

وقبل ما تقول طالب شهرة أعرف الشخص هذا شن أهدافه وشن يبي وشن صرف على الموضوع وكان لقيته صارف من ماله ووقته ومجهود رقم فلكي من أجل غايات انت ما تشوف فيها ما تقول طالب شهرة.

طالب شهرة بوجهة نظري ومرات نكون غالط هو اللي يقدم في كلام فارغ او موضوعات جدل ويتعارك ويشتم الكل ولا يقدم اي فائدة للمجتمع وعلشان صفحته يولي فيها 100,000 لايك شادها اعلانات ممولة ونص اللي في الصفحة من جنوب شرق اسيا غير يديرولها في لايكات وهو ما يعرفهم ولا هما يعرفوا شن يكتب. وفي قنوات تلفزيونية طالعين يغردوا خارج السرب، وفي صفحات تتعارك وفي ناس مأجورة…

من الأخير لو تشتم كل من اجتهد وعمل وتصفه بطالب شهرة، وهو حقيقة قام بفعل حسن سمع عنه الجميع من اقصى البلاد إلى أقصاها، وانت بكل عبقرية وصفته بطلب الشهرة ونسفت مئات الساعات من العمل علشان تختصرها بكلمتين “طالب شهرة”

خلاصة الأمر ما تفسد على غيرك روعة نشر المعرفة فكلمة “نشر” انت تعتبر فيها شهرة وطلب شهرة وانا نشوف فيها غاية عالية، وزيد تعلم هرم ماسلو للإحتياجات ففهي بعض الناس في القمة إما في القمة أو بعدها.. وطلاب الشهرة بعدهم وطبعا هرم ماسلوا ما يتكلم عن الخير والشر، في اللي يشوف في الشهرة والمال وقود حياته.

فأرجوك يا أخي صاحب مقول طالب شهرة أخطانا وقالك يوسف الجروشي في اعلان ليبيانا “ترا خوذ الوسع” بجديات أنت مزعج ومحبط للأخرين

مش طالب شهرة ومش أصلع باهيو هكيو 😂😂😂