بنتكلم على موضوع التشهير وتحطيم المشاريع والشخصيات على السوشيال ميديا عن دون علم..

الحادثة: منظمة مجتمع مدني NGO تعمل حقيقة على الارض وارى اعمالها على الارض ونعرف ان فيها شباب من خيرت المجتمع… قامت بعدة مشاريع بتعاون دولي استشاري وفني مثل مشروع تعليم ومبادرات اقامة مشاريع ومشروع خرائط الخ من اعمالها واللي تقدروا تلقوه في موقعها… اسمها منظمة ممكن… تتبع مفوضية المجتمع المدني اللي تتبع رئاسة الوزراء..

قامت بمبادرة مدنية شبابية لعنونة ليبيا وهذا مش اول مشروع يقام ولا اكبر مشروع فقبلها في مشروعات مثل انعتني ومكاني ودليل ليبيا وخرائط ليبيا وخرائط ابل و MAPS ME واضغم مكان فيه بيانات هو google maps ناهيك عن الترسيمات والعنونة من الجامعات والبريد وشركات خاصة.

وحسب ما اعلم ان المشروع تطوعي من عدة اشخاص ولا يوج دعم خارجي او داخلي للموضوع يعني مبادرة زي مبادرتي

تطلع صفحة مزورة زي صفحة تك بدون اي دليل وبناء على فرضيات تشوه منظمة او اشخاص وممكن تعرض حياتهم للخطر وتخليهم مسبة لناس وعرضة للمشاكل… في حين ان الاجراء السليم لو صح الخبر تمشي تولع سيارتك يا ادمن الصفحة وتمشي لهيئة المساحة وتمشي للمفوضية والرئاسي وتفتح الملفات والنقاشات والبلاغات والشكاوى ويقولك موضوعهم سليم

وهنا لا اعلم ما علاقة موضوع ترسيم خرائط وتوضيح بيانات على خرائط باي غزو او اغتيالات او احتلال كم تقول الصفحة..

ألم يكن الاجدى لك ان ترى كمية المعلومات في خرائط جوجل… ألم تعلم ان جوجل وابل يمسحون الارض كل عدة اشهر ويوجد شركات مشاركة اقمار صناعية ممكن تدفعلها 10,000 $ تصورلك اي موقع على الكرة الارضية live.

الجهل بالتقنية ما يخليك تحكم على الناس… واتمنى من المنظمة انها تفتح الموضوع وتاخذ الحماية والاطلاع من مفوضية المجتمع المدني ومصلحة المساحة وكصلحة الطرق والجسور والهيئة الوطنية لأمن وسلامة المعلومات…

وبالله بلاش منه الاستخدام السيء لسوشيال ميديا…عندك غيرية على البلاد فهي في المحاكم والجهات القضائية والرقابية وارفع فيهم دعوى بالخيانة وباسمك وصفتك وكان معاك الحق نصفقولك ما معاكش الحق تعتذر…

هكي دولة القانون تقول،،، ولو تبي دولة الجموع والجهل والفوضى هذاك كلام اخر ومش راح تكون بعيد عن اي مخرب…
وهذاك انا ماليا علاقة بيه

اللي عنده شك وخايف يمشي يدورهم ويقعمز معاهم ويستفسر على كل شيء وكان ما اقتنع وهو وطني حق يمشي للمحكمة والمحاكم ما تتهاون في قضايا الخيانة… اما الطعن والتشويه اليوم فيهم بكرا فيا انا وبعد بكرا فيك انت… وهذا يسمى اغتيال معنوي يعاقب عليهم القانون

اسف على الاطالة