شفت منشور السيد واولا حمدلله على سلامتك وربي يعوضك.
في شوي نصائح نسمعوا فيها وما نحسوا بقيمتها لعند نشوفوا الكارثة قدام عيونا.. وارى الاخ داير بعض الاخطاء وهذا لا يعني ان البطاريات ما تنفجر من تلقاء نفسها… بس النصائح تقلل من الانفجار بدل من 1% تولي واحد من مليون. وهي:
– لا تشحن من محولات غير اصلية او تجارية او صينية درجة سطاش.
– لا تشتري بطارية تجارية بس لان سعرها رخيص. لانها تحتوي مادة كيميائية تنفجر لابسط الاسباب. اتجه للاصلي ديما.
– طالما الجو ساخن خلي البطارية في مكان بارد او ما تخليها في مكان يجمع الحرارة زي ما داير السيد وهو الصالون.. لان راح يسخن البطارية والجهاز ويساعد على الانفجار.
– ما تخلي الجهاز عالق في الكهرباء لليل مع نهار لاسابيع لان غير مصمم لا هوا ولا وصلة الشحن على هذا العمل.
– ما دير عشرين وصلة ومثلثات ومطولات ومحولات وتعلق اربعين جهاز في كابل كهرباء واحد لان راح يجي على حساب الاجهزة واللي ممكن ينقص عليها فرق الجهد او شدة التيار تنضرب المحولات او الاجهزة.
– في انقطاعات الكهرباء مرات يجي الضي قوي فما تخلي الاجهزة موصلة مباشرة بالكهرباء.
– لو انت تشحن بالوصلة الاصلية والكابل الاصلي والبطارية الاصلية، والجهاز قاعد ما فات عليه سنة… ارفعه لشركة في بوستة وقوللهم نبي بديل ليه لان وارد جدا في كل دول العالم قطعة من اصل مائة الف او مليون تكون مضروبة… خلل مصنعي.
– ما تخزن البطاريات لفترات اطول من سنة لانها عرضة للانتفاخ والانفجار سواء، بطاريات ريموت او باور بانك او بطاريات لابتوبات.
– ما تستخدم اجهزة النقال في درجات حرارة اعلى من 45.
– ما تنام وعلى السرير او تحت الوسادة الموبايل اطلاقا.
علشان تعرف قيمة النصائح اللي قلته ابحث على battery explosion في اليوتيوب وراح تشوف انفجارات نقالات ولابتوبات وبطاريات سيارات…
الوقاية خير من الانفجار..
شاكرا لكم صبركم على هذه المادة
والسلام عليكم ورحمة الله وبركاته
امين صالح