والله ما كنت نبي نتكلم على مصرف الامان لان مصرف اضعف بكثير مما يدعي.. ولي معه مشاكل كثيرة ومرات يقولوا هذا انسان ناقم ويستخدم في مشكلته الشخصية ضدنا… بس مدام كل اصدقائي والناس المؤثرة والناس الواعدة في مستقبل Business قالت كلمتها اليوم في أمان مولدات… خلاص وجب اني نقول ان هذا سخف.

ما هكذا تورد الإبل🐪 ولا حتى المعيز🐐؟

لعلمكم فقط، ان مصرف الجمهورية بقوته وامواله وعدد زبائنه يستطيع ان يبني مدن سكنية لشباب وبقروض حسنة وبدون فوائد ويساهم في تنمية ليبيا

مصرف خاص زي مصرف الامان يستطيع فتح مشاريع تدريب وتعليم لشباب في موضوع تطوير الكهرباء بدل ما يشري مولد 3000 دينار بعد كم شهر راح يعطل ناهيك عن السموم اللي يبث فيها..

يقدر يقرض شباب ورجال اعمال لبناء اكبر محطة طاقة شمسية في شمال افريقيا وتزويد ربع ليبيا بالكهرباء.

العالم كله والناس على الكوكب تقترض من البنوك الا احنا… يقطروا علينا وذلك علشان ما نخالفوا اللوائح والوقاونين وعادي البلاد تنحرق،، البنوك هي اللي تبني في الدول… امريكا 🇺🇸 ممكن البنك يقريك في هارفرد ويتحمل عليك تعليم بقيمة ربع مليون دولار…لان يستثمر فيك كانسان وماعندك وين تهرب من السداد

في مصر🇪🇬 البنك يشري لك سيارة تشتغل عليها تاكسي اوبر او كريم او يفتح لك بداية مصنع او يشري لك بداية مشروعك هذا ناهيك عن بنود الهبات والتبرعات للاسر المعدمة يشري لهم بذور للزراعة مجانا او ماكينات خياطة الخ.

الايام الماضية البنك الإسلامي في تونس 🇹🇳 لا اذكر اسمه تحديدا… اللي ليبيا عندها فيه 70% كاستثمار اقرض شركة كهرباء لبناء محطات توليد جنوب تونس وبالقرب من ليبيا 🇱🇾

ومرات ناخذوا منها كهرباء مستقبلا ونشروا كهرباء احنا اساسا مستثمرين فيها يعني فلوسنا لغيرنا..

في السعودية 🇸🇦 والامارات 🇦🇪 وقطر 🇶🇦 والكويت 🇰🇼 البنوك تبني في مدن ذكية وتفتح مصانع وتنشيء مدارس خاصة وتعجل حركة التنمية

للعلم بس الاستراتيجية العالمية الان ان اي شيء ديره في بلادك من تنمية مش خسارة لان راح يرجع عليك كشركة او بنك بعد سنين وذلك لان يرفع من قدرة الفرد الشرائية والانتاجية و GDP وهلبة متغيرات اقتصادية ما نفهمها

توا نرجعوا لبنوكنا الموقرة..

اكبر مشروع داره بنك في ليبيا اخر عشر سنوات هي شركة رحال لنقل والتي تتبع #مصرف_التجارة_والتنمية ولكن للاسف اقيمت كاستثمار للبنك وليس لتنمية مشروعات او اقراض يعني كذلك مشروعاتنا مشوهه..

البلاد تبي وقفة صح مش مولد واضحية… بدل ما تشري للمواطن اضحية وفر له طرق العمل والمشروعات مرات يشريها بروحه الاضحية ويخلي 30 موظف عنده في شغله يشروها بدون شغل الصدقات واللعب على العواطف… هات الحرفة مش السمكة.

مؤلم حال بلادي لا قوانين ولا تشريعات ولا ناس تبي تنتقل لعام 2020 وقاعدين فرحانين ببنزينة حقها 0.15 قرش ودعم وارباب اسر وبزنيس دولار واهو خذيت مولد وجيب شهادة مرتب وضامن…هذا مش تطوير هذا زيادة انحطاط وراح نوصلوا لمرحلة التوقف مستقبلا

بالمناسبة ليش ما درتوه قرض حسن وتشروا خلايا شمسية وبطاريات لانها انظف للبيئة وما تسبب سرطانات ومواد ثقيلة وما تبي لفات زي المولدات 🤨🤨🤨🤨

الدول تبنى بتكاتف الجهود بين الخاص والعام والدولة والشعب واستثمار للمستقبل

#مصرف_الامان