توضيح عن تقرير تطبيق المدار الجديد

والله الفيديو خادمه بروحي

والله ما خذيت فيه فلوس

و #المدار_الجديد ما عطتني لا فلوس ولا اي شيء ولا طلبت منهم شيء… ليا شهرين نطالب بالتطبيق نكون first beta tester وبعد عدد من النقاشات وضمان السرية اختاروني واختاروا ثلاث مدونين آخرين…

انا غير متعاقد مع اي شركة media

الصوت سواء جميل او سيء هذا صوتي وهذا اللي حصلته امس free بلاش ويقدر يخدمني بسرعة as voice over

المحتوى كتبته انا… والصور واخذهم انا…

فكونا من الشك والتاويل…. بس كان تحدي بيني وبين نفسي ندير شغل ونشوف هل قاعد شباب ام لا… وطلعت مزال بكامل لياقتي

التطبيق ينزل على اندرويد بعد ساعات

الفيديو مش دعائي بل يعتبر اخباري وفيه شوي نقد زيه زي اي قناة يوتيوب عالمية…

اللي قالي خليك خشن واسترجل واعطيهم العين الحمرا… ما يجيش نقل خبر ونقعد نعارك

الموضوع اجتهاد شخصي و #المدار_الجديد مشكورين ان اتاحوا الفرصة واخذوا براي المجتمع التقني….

نذكرك لما درت اجتماعات مع كبرى الشركات في يوم 1-10-2019 طلبت منهم اكثر من 80 طلب…

وايميلات… انا ومجموعة شباب صح ما درنا معاهم شيء ولا انسب مجهود غيري ليا… بس نحن كنا عامل مساعد ومحفز لتطوير القطاع وكان احد المطالب تطبيقات.

التطبيق مخدوم بالكامل في شركة المدار… مش من طرف شركة خارجية

وقاعد نعاود فيها كل مرة… احنا مش طرفين

احنا طرف واحد ومافيش اي شركة اعداء لي حتى لو كانت #هاتف_ليبيا

وتعالو جاي اللي قال شن قصة “الخفة النعومة والقوة والثقة” هل هو اعلان شامبو…. لا يا شيخ… انا غير قاري كمية كويسة من الكتب ولغتي العربية كويسة كويسة…. وفي كلمات اخرى قلتها “للوهلة الاولى… يتضح جليا… على محمل الجد… متفردة في الشمولية”… ناهيك عن قدرتي في صياغة السجع… شن بنديرلك كان اللغة العربية تعرفها بس من الشامبوات