تعال وحدة وحدة وبنشرح وحدة يلي يقول ندافع على #LTT
اولا الشركة ما غيرت باقاتها من 2018
يعني الاسعار ثابتة
وتضيف في عروض
ثانيا بداية الامور بدات رمضان 2019 لما الشركة دارت TB لمدة اشهر لجماعة ADSL ودارت تحميل مجاني مفتوح وقعدنا نديروا في مطالبات شهرية بالتمديد
لغاية وصلت شهر فبراير وتغير تعامل الادارة
كان غير ناسي نفكرك
لما لغيوا التحميل المجاني المفتوح الليلي قامت الدنيا لم تقعد ووصلنا لتصويتات ان رجعولنا المجاني وندفعوا 50 دينار شهري علشان المجاني لليلي وخصوصا جماعة البليستيشن والافلام
الادارة سكرت راسه وقعدت تعجن وتبل في العروض وفوضى تسويقية وفنية ووصلنا لعند شهر 5 لما لغو كل الباقات وداروا الغلاء الفاحش وفوضى وطالبنا باسقاط الإدارة
توا الادارة الجديدة تقريبا ليها شهر… راسلتهم كذا مرة والتجاوب اكثر من ضعيف
المهم خلي نشرحوا العرض هذا
العرض لشهر unlimited
او المفتوح 45 دينار
العرض لمدة أسبوع
20 دينار
العرض لمدة ليلة واحدة
5 دينار
توا السؤال… اذا كنت متوقع اسعار ثابتة تخفض في ظل سعر الدولار او انترنت unlimited فهذا ضرب من الخيال
لما كان مفتوح unlimited درنا تصويتات وان نبوا نشيلاو الحرج من على الشركة ونخلوها 50 دينار علشان تقعد ثابتة
انا مانطلب في المستحيل من حد… نطلب في المستطاع ومحشم الكل
للعلم لا يوجد انترنت 4G غير محدود في كل العالم
فتشوا بالصيني فتشوا بالهندي باي لغة
بس للعلم….ADSL مفروض unlimited
يعني ADSL في العالم اغلبهم غير محدود
المطالبة تكون بالمنطق والعقل مدامك لقيت من يسمعك
تعلم وافهم وخليك منطقي.. وناقشه بالعلم
وكان تبي الشركة تخسر فانت حر بس انا ما نبيها تخسر… لاني شفت الكهرباء شن صار فيها
دير عروض لعند توصل لنتيجة طيبة ترضي الجميع
اما الشتيمة فلا تخدمهم ولا تخدمك…
يقولي عندك تاثير على الشركات… والله نعرف اني نهدرز بالمنطق
يعني مشيت وتكلمت مع المدار وليبيانا والوزارة ول ت ت والقابضة وعرفت مشاكل القطاع
بعض الشركات قالك مستعد نخليلك الجيجا بربع دينار في النهار لو تخلي #هاتف_ليبيا السرطان تخدملنا فايبر وتنقص اسعار التراسل اللي توصل في بعض الشركات لمية مليون
اللي يبيني ناقش… عادي ناقشك باحترام ومنطق زي ما ناقش في الشركات
للعلم بتقولي مأجور… ول ت ت دافعتلك بنقولك معلومة قبل ما نديرلك بلوك… سواقين #ليبيا_للاتصالات_والتقنية يسبو فيا ومن اقل موظف الى اعلى موظف وكان يلقوا يخلوني معاش نتكلم طول عمري…
ويوم المدير الحالي او التجارية او اي ادارة تفسد اسقاطها وارد… بس مدام يشتغلوا نشد على اياديهم حتى لو كانو يستحقروا فيا… انا ندور في بلا
انا ندافع على المنطق والحق والتقنية…
قول كلام منطقي…. انا متاكد لو الشركة بكرا تقول نلغوا الباقات بتع اليوم راح تطلعوا مظاهرات
تعلموا ان تشكروا من يعمل العمل الصحيح وتنتقدوا بدرجات ونقد بناء من لا يعمل والنقد مراحل… مراسلات نفوذ منطق ادارات شكاىى اسقاط ادارات مظاهرات نائب عام… وتبدا من اقل شيء الى اعلى شيء
انا فخور بنتائج قطاع الاتصالات لاخر سنة ومزال جزئية بسيطة في التشيرعات والالياف البصرية
اسف على الاطالة
هنا امين صالح 
