والله قلتها اكثر من عشر مرات،، قضيتي واضحة وضوح الشمس، وموضوعي لا خدمة ولا مصلحة ولا مال ولا وصول لمنصب، وانا ما نبي من حد شيء،،
قلتها إن قضيتي هي #الوعي_التقني_للجميع ومش من السهل نقنع النخبة المتعلمة والمجتمع التقني ، ولا نقنع مؤسسات الدولة المتشظية…
حاولت ومزال نحاول وبنستمر… واللي ما عجبه يعتبرني مجلة في حلاقة،، مش لازم يقرا،، انا نقدم في خطاب توعوي منوع فيه كل شيء… تقنية، اخبار، مراجعات، نقد هادف بناء، #شركات_الاتصالات_الليبية ، حصريات ، #البنوك_الليبية ، مقالات ، تيك بودكاست، خواطر، نصائح في التقنية.
يعني انا أرى إني انسان مفيد، بلاش تشتمني، وادعم أبناء بلدك، ما تدعمني انا، ادعم عشرات المدونين التقنين، انا مستمر في النضال والطريق وعرة وصعبة،
في شركات اقتنعت بالتطوير، وفي مؤسسات قاعدة متحجرة…
أطمح لتعديل قوانين ولوائح وتشريعات، مش حاجة ساهلة ، قانون للمدفوعات الإلكترونية يصدر من المركزي، تشريع او لائحة اعتماد Email كوثيقة رسمية لدولة ودليل اداري وجنائي ومالي، قانون حرية المعلومات، قانون حماية المستهلك، قانون اتصالات محدث يشترك فيه كل شركات الاتصالات ومنظمات المجتمع المدني الحقيقية التي تعمل على الارض والدولة وجهات دولية ذات خبرة وبيوت خبرة.
كثيرة هي الاهداف والمطالب، درنا جسم شرعي نخاطبو بيه مؤسسات الدولة والشركات ونسدوا الفجوة بين الشعب والدولة #المنظمة_الليبية_للتقنية_المعلومات_والاتصالات
نحاول نضغط وبكل قوة وبكل انواع القوة الإعلامية والقانونية والفنية والتقنية… مش مضايق اني ندفع كل شهر 100 ساعة من وقتي و قيمة مالية علشان بلادي…. بلادي درستني بلاش،، بلادي ليها فضل عليا وهي صاحبة الجميل عليا… مش انا اللي نتجمل عليها.. انا نرد في جزء بسيط من اللي قدمته… حتى لو كان قادتها ومسؤوليها ومؤسستها تعبوني وعذبوني…
نحاول انا ومعاي نخبة من المدونيين والتقنيين نديروا نقلة للأجيال اللي بعدنا… صح ما درنا لهم استثمار او مال.. بس علمناهم شن هي التقنية وشن هوا التدوين ونعلموه شن الفرق في المفاهيم بين الوطن والدولة والبلاد والارض والمواطن والخدمات والمسؤوليات والتوجهات والاراء…
ابدأ باللي حوليك… وعلمه الصح،،، مافيش واحد فينا ما يتعلم كل يوم حاجة جديدة… وشارك اللي تعلمته،،، هكي نطور انا وانت وغيرنا…
اسف على الإطالة ولكني أوجه تحية من قلب وروحي لكل مناضل حقيقي يعمل من اجل ناسه واهل ووطنه.. كل مدون تقني قاموا بالإستهزاء به،، لا تحزن.. انت اليوم يضحكوا عليك… بكرا راح تشكل تاثير… وحتى بدون التأثير… أنت راضي عن نفسك… وفي الاخير كلنا مستفيدين من هذا الوطن… ولو خسر الوطن كلنا خاسرين..
وخلووووووو معنوياتكم فوووووووق