ليش الناس ما تدعمش بعضها… ليش بعض الليبيين المحسوبين على التقنيين يحبوا يحطموا بعض.. ليش ما نقيموهاش ببعض وببلادنا..

نقرا في بعض الاحباط والرسائل الضمنية وتوصل حتى في الشتيمة وتقليل القدر… وبارك الله في المجموعة الكويسة اللي يدعموا في هكي ناس..

ليش قررنا اننا نعيش بخبث ودسائس وتلغيم وشتيمة ونفاق وحفر ومكائد.. في حين اننا لو سلكنا الطريق الصحيح اللي سلكاته كل الامم والجول اللي قبلنا راح نوصلوا..

ادعم منتج بلادك.

ادعم صادرات بلادك الفكرية والادبية والصناعية والزراعية والعلمية.

ادعم شباب بلادك.

ادعم شركات بلادك مش شرط اتصالات… حتى طيران واستيراد وتصدير ونقل وخدمات وتطبيقات.

ادعم كل ماهو لصالح العام.

والله ماهي صايرة ليك حاجة ولا راح تتاثر ولا راح ينقص من قدرك لما تشارك او تعلق تعليق كويس… اللي يعرفوني يعرفوني ندير في مشاركة لكل من يرونهم الناس “خصوم او منافسين او اعداء او صاحب صنعتك عدوك” لا عندك خلط في المفاهيم… هذا بادرة طيبة وليبي ولما تدعمه راح يدعم غيرك وتلف الدنيا وبعد سنوات راح نحصدوا كلنا مجتمع واعي..

واللي يشوف فيه وهم وكلام فارغ وجري وكساد… خلينا في الوهم وانت يا سيد خليك في المفيد…. خليكم في الواقع وخلونا الوهم التقني… مش كل الناس نفس درجة الحكمة والوعي.. اقروا هرم ماسلوا للاحتياجات وتعرفوا ان اللي يقدم في علما مجانا شن ترتيبه

مراد ابوستة عنده مدونة التطبيقات اللي تحقق في ملايين الزيارات سنويا

علي الطويل عنده باع كبير في التدوين

حسين بلحاج عنده مادة مفيدة صاعدة

حبيب نينو عنده كتابات في التحول لتقنية

وغيرهم وغيرهم وغيرهم

هذوم صناع التغيير Change Maker

كان ما عرفت تقوللهم بارك الله فيكم وشكرا على نشر الوعي وتعاونهم…وهذا كله مجانا يقدموا فيه… لا اقل من ان تلزم الصمت… وديرلهم حتى لايك ولا بلاها اللايك اللي ممكن ضايقك في الوعي…. الفطرة السليمة تقولك ما تحارب الفائدة والخير