انا تعودت نكون قاسي ضد الشركات طوال عام ونصف بس من لما جت ازمة كورونا خفيت هلبة وهديت ومعاش نضغط لان الظرف معاش اصبحت قابلة للعمل… قبل والله ما نسكت على اي شيء تندار in house

بس اليوم خلي نوضحلكم الخطوات اللي تمر بيها عملية الصيانة وهذا اجتهاد شخصي… وديما الصيانة تاخذ وقت… فاعطوا الشركات الوقت… لاني بديت نشوف في شتائم للموظفين والشركات غير مبررة وهما اساسا يخدموا:

1- التاكد بعدم وجود الغام او مواد متفجرة او قابلة للانفجار او جثث او ادلة جنائية او مناطق لازالت تحت العمليات والتمشيط الخ… وهذا مش تبع الشركات.

2- توصيل الشركة العامة للكهرباء.. الكهرباء.. وهذا شيء معقد تعرفه الشركة وهو توصيل خطوط 220 وخطوط ومحطات 30/11 وبعدها نقاط توزيع 11kv /400 ومن بعده لمحطات الكهرباء… محطات الابراج ما تخدم الا بالكهرباء.

3- مراجعة هاتف ليبيا للابراج والمقسمات الرئيسية وخطوط الالياف البصرية ان كان بها اي خلل او عطب.

4- في حالة #هاتف_ليبيا عندها مواد صيانة ومولدات وموظفين يخدموا والا يصير زي بريد والبرج الرئيسي في القصر… تصلح #المدار_الجديد وتجيب مولد علشان المدار تشغل 25 برج معتمدين عليه ولا تراجي اربع شهور هاتف ليبيا ومشاكلها… وبعدها هاتف ليبيا تحط يدها على الممتلكات… والامر هذا صاير مع #ليبيانا و #ليبيا_للاتصالات_والتقنية .. في تاخير الشركة المزودة في الصيانة لبيروقراطية او نقص معدات الصيانة

5- تقييم ومسح الأضرار : بعض المحطات ممسوح نهائيا وبعضها مضروبة فيه السكاتير ويعضها مضروب فيها توصلات الكهرباء وبعضها طايح نهائي.. وبعضها مش صايرله شيء بس جاي في منطقة مضروب فيها البرج الرئيسي زي ترهونة والسواني… وبعضها مضروب فيه الاساسات الخرسانية وهذا اصعب شيء لانه يبي عمل ميداني ومقاولات وشهور.

6- لما يحددوا كل واحد وشن فيه… تنطلق فرق الصيانة ويشوفوا شن متوفر في المخازن… هل ابراج 4G او 3G او 2G…. وهل هي معدات جديدة ولا قديمة ويركبوا وفق الاحتياج بما لا يخل بمشاريع التطوير في المناطق الاخرى مثل الجبل.

7- لو وصلت الشركة العامة للكهرباء الضي اللهم بارك… لو ما وصلت… يجيبوا بطاريات ومولد ويقعدوا يلفوا على الابراج ويشحنوا في البطاريات او يديروا حلول تلفيقية… حيث انهم شركات اتصالات مش كهرباء

8- بعض الابراج اساسا كان في موقع غلط وكويس ان طاح… فالفنية يدوروا مكان اعلى واحسن واكثر قوة.

ملاحظات وتعديلات :

1- عدد الابراج المدمرة 220-250 برج في عموم جنوب طرابلس وممكن البقية في مناطق اخرى يوصل الى 50 أخرى.

2- استخدام مقوي اشارة ريبتر صيني او غير اصلي او مقلد او غير مدعوم من الشركة راح ينهي الاشارة في المنطقة اللي يديروا فيها صيانة

3- لا يوجد قوة بشرية كافية لان وضع كورونا موقف الدنيا كلها.

4- كل الشركات تضررت… وبعضها ما يقدر يقاوم الضرر لان مفلس مثل #هاتف_ليبيا و #شركة_البنية ومنها اللي وضعه صعب ماليا ومتلخبطة عليه زي #ليبيا_للاتصالات_والتقنية واللي حالهم كويس يقاوموا مثل #ليبيانا و #المدار_الجديد

5- انتظر ايميل رسمي من ادارات الشركات بالخسائر الحاصلة لهم بالارقام وهي اكيد بعشرات الملايين من الدينارات… وهذا كارثة لانه راح ينقص من ايراد السنة لقطاع الاتصالات واللي يمد في الميزانية العامة لدولة بنصف مليار سنويا او 4% من الناتج المحلي.

6- كل ما سبق اجتهاد شخصي مني انا امين صالح وقابل لتعديل والاضافة

وارجوا ان اكون قد وفقت في الشرح