اليوم ماهواش وقت قياس سرعة او تغطية يلي تشكوا من التغطية والسرعة…
بعض الناس وصلت 120mbps
وناس تغطية وهمية
وناس تقطر فيه زي dialup
الوضع اليوم في ظل البلاك اوت وبطاريات وابراج متوقفة رئيسية وفرعية والشرق واقف بسبب هاتف ليبيا
ما تقدر تحلل…
الشبكة تتوجع من جميع الجهات وكذلك ليبيا والكهرباء وبالتالي الشعب..
منشورات تقول توا بالله هذي سرعة… يعني هي بلاك اوت… وتقيس في سرعة… والله اني ندعي من بكري ما ندخلوا في انقطاع تام للاتصالات…. بعدين الوضع يصعاب جدا جدا جدا جدا
الاتصالات عصب اساسي مثل الطاقة “وقود وكهرباء” والمواصلات
توا يجيك الضي اشحن تلفونك واجهزتك وولع المكيف واستقرار الشبكة الكهربائية وشبكة الاتصالات يبي من يوم الى يومين…
حتى بلاغك اليوم على التغطية مش راح تاخذه اي شركة بشكل جدي… وفر مجهودك والغضب…. والكهرباء ليها ساعات تجتاح في المناطق… منطقة تلو الاخرى.
من باب شرب نص الطاسة المليان وليس النظر له
لاول مرة تستطيع الشركة العامة للكهرباء ارجاع الشبكة بعد البلاك اوت في خلال 5 ساعات… اخر بلاك اوت حدث اليوم 2 ظهرا وعودة الشبكة بالكامل وبداية الطرح 7 مساءا
هذا انجاز ضخم… اصبحنا خبراء بلاك اوت…
لزيادة دخل الدولة المفروض نستقطبوا اجانب ياخذوا عندنا دورات كيف ترجع شبكة قارة مثل ليبيا في خلال خمس ساعات بدون اتصالات وفي حرب ودرجة حرارة 45 ورطوبة 65%…
يزيدوا دخلهم ويشروا بيهم توربينات…
اللي يجيه الضي يشحن ويولع المكيف… اغتنم الفرصة فلا تعلم متى ياتيك البلاك اوت القادم.
الصورة من اعدادي انا 
