سبحان الله امين تغيير وقعد يجيب في اخبار الشركات ويصفق لهم. ومعاش في صولات وحملات ومقاطعات… لا لا ماهو تخلص فيه القابضة علشان يضرب الهيئة.. تي لا لا هذا يرتب لموضوع مع الوزير الجديد…
كل يوم نسمع في عشرات الشائعات.. اللي انا مستمتع وانا نقرا فيها.
للعلم بس من لما بديت وانا نجيب في اخبار الشركات ومن داخل.. والموظفين والادارات التجارية والفنية والاعلام والعلاقات مضايقين مني… ومستمر نحط الاخبار.. ويهمني الصالح العام
سبب خلافاتي مع الشركات فنية ومهنية وليست شخصية ومن اول يوم قلتها اننا في طرف واحد فلو واحد متوهم من اول يوم اننا طرفين او انني ضد #الهيئة_العامة_للاتصالات_والمعلوماتية او شركة او ادارة او شخص او اني ضد اي شيء يحرك عجلة التنمية فهو غالط.. ونظف نفسيتك لانها هلبة منسودة يا خونا 
هي مش تربونات وتشجيع وزيد اقصفهم وزيد وريهم وزيد اعطيهم على روسهم… هي تنمية واصلاح وتطوير وتحسين.. يوم نقول شكرا المدار ويوم نتعارك معاهم على اعلامهم يوم نقول الهيئة راقدة ويوم نقول مفروض يديروا.. انا قلتها وقاعد نقول فيها من اول يوم… حيادي وموضوعي ومهني… ونغلط مش ما نغلطش ونعتذر لو غلطت في حد او جهة..
انا والشباب وصلنا الامور ان الشركات والمؤسسات يسمعوا لناس الموضوعية فقط مش اللي يشتموا.. ويحسنوا ويعدلوا ويحترموا الاراء ونرتقي بالجميع.. كان حاط فيا املك نصفي خصومك او نتعارك او مستمتع فانت غالط وبعيد..
ولما نقول يجب توعية المجتمع ونديروا مقالات لان المستخدم غالط في نقطة بالله بلاش منها تصنفني اني نتبع الشركات… والله ما يخلص فيا واحد ويوم حد فيهم يعطيني فلوس توا نكنبها sponsored by #####.. … اما غير عن هكي انا عندي رسالة ونبي نوصلها #الوعي_التقني_للجميع شركات ومؤسسات وافراد ودولة وانا.