السلام عليكم ورحمة الله وبركاته

انا امين صالح مدون تقني من سنوات وناشط في المجال التقني على منصات فيسبوك من اكثر من عام…

تكلمت على #ليبيانا وانتقدت #المدار_الجديد في اسعارها وادارتها

وعروض واسعار #ليبيا_للاتصالات_والتقنية #LTT كانت مضايقة للجمهور وعدلوها… بلغت عن اخطاء موجودة في القابضة للاتصالات وشركاتها… مشيت لهيئة الاتصالات. دعمت خدمة #سداد بكل قوتي.

تكلمت على #الوعي_التقني_للجميع وكيف تحمي نفسك واختيار كلمة مرور سليمة قوية… وضحت اخطاء وزارة التعليم في الخصوصية… رفعت رسائل بخصوص ثغرات امنية لي #الهيئة_الوطنية_لأمن_وسلامة_المعلومات

وضحت لمشروع الرقم الوطني اخطاء يقوم بيها… بلغت عند إدارة الرقابة على المصارف والنقد اخطاء مصارف من بينهم الامان والجمهورية والصحاري والنوران والوحدة وخصوصا #مصرف_التجارة_والتنمية في اكثر من مناسبة…

وضحت اخطاء تقنية وقعت فيها الجمارك.

خضت معارك ضد متصيدي البيانات على facebook وحاليا ممكن ينفتح فيهم بلاغات دولية… راسلت منظمات ومراكز اجنبية في بعض التعديلات التي تخص وضع ليبيا تقنيا.

وتباينت ردود الفعل بين الباهر وغير المبالي والمتعاون والمحارب..

وكله من اجل الصالح العام والبلاد… ويعلم الله اني حاولت ان نكون فني وتقني ومهني جدا في كل المراسلات والمطالب والايميلات…

توا جاء دور #مصرف_ليبيا_المركزي #CBL

كنت قد ارسلت رسالة للمحافظ من شهرين بتاريخ 9-2-2020

والموضوع مش عداء ولا اي شيء… ولا تصييد اخطاء ولا اتهام… انا نبي نصلح وبحكم ان اجراءات منظمات المجتمع المدني في ليبيا متعثرة.. وكذلك المنظمات ذاتها مش فاضية بالصلاح والتقويم… فأنا نتكلم باسمي.. وهذا حقي وكفله لي القانون: حرية الرأي وحقي فس هذا البلد هو ان نطوره ونفيده بشكل اكبر وهذا دين نخلص فيه… بحكم البلاد قدمت لي الكثير زي ما قدمت لكل المواطنين،… علما ان عندي منظمة في الاجراء من ستة شهور تحت “المنظمة الليبية لتقنية المعلومات والاتصالات” والاجراء متعثر نتيجة الظروف.

ما علينا في كل ما فات، توا موضوعنا المركزي في تشريعاته القانونية بما يتماشى مع وضع التطور التقني في العالم… العالم كله واقف وانت تخلص في موظفينك… خليهم يشتغلوا من منازلهم في قوانين وتشريعات ولوائح تنظم عمل الفوضى البنكية في ليبيا…

اطرح الموضوع للمشورة… انت البنك المركزي اقوى سلطة مالية… خليهم يشتغل تقنيا صح… وكان مش قادر سكر وخليها غابة… لانها توا هي اقرب من الغابة:

فوضى في اجراءات الخصوصية

انقطاع اتصال بفروع

غياب التنسيق بين البنوك

توقف المقاصة

تضارب المنظومات

صفر توعية مجتمعية

عدم حماية اموال الزبائن من القرصنة

الاداء التقني فقط تعاقدات مع شركات تقنية اما التدريب والتطوير 0

سيادة المحافظ… السادة اعضاء مجلس الادارة… كل المسؤولين اللي تقروا في صفحتي… وعلمت ان المتابعين من قيادات الدولة من التوجهات هم كثر…

هل ممكن ما تقعدوا تصنفوا فيا مع او ضد او نبي وما نبي.. وديروا نظام الخبث واني طالب شهرة وطالب تعيين وطالب ابتزاز … هدفي اولا واخير هو الصالح العام… وهدفي بلاد يعيشوا فيها الجيل القادم حياة افضل من اللي عشنها نحن…

في انتظار اي رد او تعاون من طرفكم… لان لو ما لقيت آذان صاغية… راح نطرح افكاري وانتقاداتي وشكري وقلقي وكل ما يجول في فكري سواء كان حقا او عن حق او عن نقص معلومات لم ازود بها من طرفكم… ساطرحه كل مت سبق بالتفصؤل على منصة فيسبوك ومدونتي الشخصية ونرى ما يمكن عمله بالتقنية… للعلم انا فاضي ثلاثة شهور القدام.. يعني ماعندي ما ندير الا نحلل شن صاير معاكم.

في انتظار تجاوب

أمين صالح

15-4-2020