خلي نوقف شوي مع شركات الإتصالات والأزمات اللي يشوفوا فيها:
عندك مدراء يواجهوا في تهديد السلاح وعصابات ووضع امني سيء جدا لدرجة ان في بعض التوظيفات ضمنيا تمت تحت التهديد… مافيش حل إلا يتحملوها..
عندك هلبة ناس من ضمن الزبائن يمشي يربش برج او يسرق بطاريات ويبيعهم في الرابش وقيمة البطاريات توصل لمبالغ تاثر في الشركات سلبا… وهي اساسا مش راح تجيب شيء لسارق.. يعني انت اللي خاسر… نتكلم على كونتينر مش بطارية حوش ولا شاحنة.. بطاريات الابراج حاجة ثانية…
عندك اجهزة التشويش في المساجد واجهزة اعادة تقوية الاشارة اللي تسبب في فقدان كل المنطقة للإشارة وبالتالي التغطية تكون متذبذبة او مافيش تغطية نهائيا… والزبون من حقه يشتم الشركة والشركة حاصلة مش قادرة تمنع حد لان مافيش سلطة قانون… ولا قوة لتطبيق القانون وللأسف اكثر مدينة تعاني من اجهزة التقوية الصينية هي مصراته ثم طرابلس
عندك الشركة العامة للكهرباء دايره الهم كله…مافيش اي بطارية في العالم تقدر تصمد شهرين ينقطع فيهم الضي عشرين ساعة ويرجع اربع ساعات… طبيعي الابراج تقعد طيح واحد ورا الثاني وحتى لما يجي الضي راح تفقد التغطية…
عندك فساد الوكلاء وفساد الموزعين… وهذوم دايرين نظام موظفي البنوك… يشوفوا في انفسهم ما فيش كيف نستفيدوا إلا من بيع الشفرات او التحايل او نطلع شفرة فلان ثقة ويدفع مية دينار… حالات دفع غير مثبتة
عندك حظر من شركات عالمية على بعض المعدات انها ما تدخل لليبيا وهذا مسبب نوع من التخلف…
سيطرة القابضة على مجالات عمل الشركات::: ليبيانا مزود اتصالات فقط.. ل ت ت مزود انترنت فقط بدون صوت… المدار شركة الدولة وشركة المهمات الخاص واللي يحبها المركزي وتحبها قطاعات الدولة ومسموحلها فاتورة ومسموحلها تتعاقد مع التعليم…. خلي ناخذوا منعرج تاريخي شوي
———————شوي تاريخ
في الاول كان القطاع عبارة عن البريد وخلاص بعدها البريد اصبح يتوسع ويترهل ويتعب ويقدم وخشت عليه 2G وخش عليه المدار الجديد وقالوا هيا نقسموها… داروها عدة شركات منها البنية وهاتف ليبيا والنوعية اعتقد… والقطاع جد عليه شركة اسمها ليبيانا واساسا محمد معمر القذافي كان مكتبه في LTT كاول مزود انترنت والوحيد… وكان يحب الشركة جدا ومسخرلها كل النفوذ… زاد الحجم واصبح في شركة تسوق وتبيع في الانترنت اسمها الجيل الجديد وقبل بتوزع ارقام 096 وشركة ل ت ت بتدير رقم 095 لرجال الاعمال…. وبعدها في شركة اخرى ماسكة سانيسكة الانترنت والاتصالات اسمها الدولية… بسلامتهم كلهم اصبحوا( ليبيانا والمدار وهاتف ليبيا ول ت ت والنوعية والبنية وهاتف ليبيا والجيل والدولية) قالك شن ندير علشان نسيطر على الشرك الكبير هذا… قال ندير شركة قابضة تعتبر الاب ويرجعولها كلهم وما حد يطلع منها وانا نسيطر عليها ونسخر كل شيء عليها “هذي اللي صاير عليها العراك توا” جت الثورة ودرنا دولة 🤨🤨🤨 ودرنا وزارة اتصالات… ماقدرت تاكل خبزة مع القابضة… درنا هيئة… صقع عليهم… مافيش فايدة… اتحدت الشركات مافيش فايدة…
المهم توا عندنا شركة اسمها هاتف ليبيا هي القوة الضاربة بتع القابضة حيث انها اسم على مسمى… تقبض على القلوب…
قانون : اي كابل فايبر تحت الارض تعود ملكيته لهاتف ليبيا
حقيقة : مقر القابضة والوزارة في مبنى البريد شارع الزاوية في هاتف ليبيا
تلتزم كل الشركات بتنفيذ تعليمات القابضة (العبوا مع بعض خوت…. ليبيانا والمدار اتصالات صوت….. ل ت ت ما دير اتصالات صوت بس تلعب في مجال data ودير ما تبي… الدولية سانيسكة…. بس كلكم لازم تستخدموا البنية التحتية بتع هاتف ليبيا بالايجار…. ونهاره اسود اللي ما يدفع زي ل ت ت…… اي حد يبي يدير استراتيجية او خطة تطوير القابضة وفق نظامها الاساسي واغراضها ممكن تمنعها) يعني من الاخير عندنا اخطبوط اداري مالي تشريعي فني تقني في مبنى البريد….
————- حفنة من التاريخ تمت
تخاذل بعض الموظفين عن المبادرة باي بادرة جديدة ممكن تغيير الوضع القائم والإكتفاء اني ندير شغلي فقط…
عدم وجود اي حلقة وصل مع الشارع في قانون العمل الليبي
عدم وجود تشريعات صادرة عن برلمان او جهة تشريعية موحدة تقوم بإصدار قانون تنظيم الإتصالات، قانون الجرائم الإلكترونية قوانين وسياسات على هذا النهج تستطيع ان تستند عليها الشركات…
الإنقسام الحاصل وعدم تمكن موظفي ومهندسي الشركة من الوصول لبعض المواقع لصيانة…
عدم قدرة الشركات لتدريب موظفيها في الخارج لفارق سعر الدولار الكبير… حيث ان اضخم عمليات تدريب حدثت في قطاع الإتصالات كانت في 2012-2014 وكانت مؤثرة وهذا سبب صمود القطاع حتى اليوم
في ذات النقطة السابقة عدم قدرة الشركات على تصميم تطبيق يستطيع الوصول واخذ معلومات الدخول لقواعد بيانات الشركة ويكون امن… فهذا الأمر إن لم يكن يحتاج إلى تدريب فهو يحتاج إلى تكاليف مالية بالدولار…
سوء التواصل والتنافسية المفرطة الكاذبة بين الشركات… فتجد ان هذا برج ليبيانا وهذا برج مدار وهذا برج LTT وفعليا بالإمكان دمج كل الشركات في كل الأبراج… بشكل افتراضي….وتقاسم قيم الإيجارات مما سيسهل على الجميع التغطية والسرعة
فوضى الشركات الخاصة في موضوع الترددات يجعل الشركات الضخمة في حيرة…
كسل وعجز الوزارة والهيئة عن القيام باعمال كثيرة ويرجع السبب إلى الإنقسامات السياسية والمالية…
كل ما قلته سلفا بالإمكان ان يحل في شهور وان الوضع غير كارثي ولكن قد يكون كارثي في لحظات في حال فقدنا مراكز بيانات شركات او محطات توزيع مثل ما حدث مع ب ت ت الايام الماضية او تم الإعتداء على شركات او مواطن سكر راسه على بروج وطيحه… القطاع يقوم بالشعب طالما مافيش دولة توقف معاه…. اوقفوا معاه وكل شيء يصلح
هذا قليل من كثير فان اصبت فمن الله وان اخطات فانه من الناس اللي وصلت لي الكلام ومن تفهيمهم ليا 😁😁 انا مش شوري…. العملية ماشية والقادم أسوأ
أمين صالح
مدون تقني