خلي بنتكلم على موضوع في قمة السخف سمعته اخر ايام… هو اشاعة ضخمة: الطائرات الحربية المسيرة من جميع الاطراف تستخدم نت ليبيانا والمدار الجديد علشان تقوم بعملياتها…
مالياش علاقة باي طرف سياسي او عسكري.. بس حقي نتكلم على الجانب اللي يخصني وهو الجانب التقني..

يا سيد افهم معاي وكبر عقلك:
اولا: وقبل كل شيء هذه طائرات تتكلف من 250الف دولار الى مليون واثنين مليون دولار حسب التقنية المستخدمة وهذي تقنيات عسكرية مش مسموحلها تبث على اي شبكة اخرى الا شبكة وحدة او خطوط تراسل مشفرة وغير معروفة.

ثانيا: تكلفة زي هذي لطائرة الواحدة مش مستعدين يحطوا فيها شفرة ليبيانا او مدار او LTT علشان يستفيدوا من خدمات الانترنت الجبارة في ليبيا بحكم اننا مقطعين الدنيا بالنت السريع و Latency اقل من 1ms. الي احنا مش قادرين نضربوا بيه بمسدس في pubg ولا نلعبوا call of duty. يعني موضوع فاشل بالنسبة لأي قاعدة عمليات يعتمد على انترنت غير مستقر لشعب،، فما بالك لاغراض عسكرية.

ثالثا: مدى ابراج 4G في احسن الاحوال وفي المناطق المفتوحة ومافيش سكان او مباني او تضاريس توصل 7km..يعني دائرة نصف قطرها 7km… ولو منطقة مزدحمة فتنخفض هذه القيمة الى 3km.

رابعا: الطائرات العسكرية بدون طيار وصلت من مناطق نائية وهي مناطق مافيها تغطية… شغل عقلك كيف كانت تمشي مسافة 100km او 200km بدون تغطية نت… ماهو طبيعي بتكون بالاقمار الصناعية..

واخيرا: شغل عقلك ومعاش تنجر وراء شائعات نطفوا الابراج او نخربوها ومعاش نبو تغطية 4G او تغطية نت mobile data 3G.. لانك مش راح تاكلها الا في روحك وبضيع وقتك بدون الاستفادة من خدمات الانترنت…. عليه خليك واعي شن تقول وشن تنشر على فيسبوك بدل الهبل والغباء اللي نسمع فيه ان الطائرات المسيرة تستخدم في ليبيانا والمدار للحركة… وبالفعل في مدن سكرت التغطية للأسف نتيجة هذا الجهل ومناطق طفو ابراج… العالم واصل لمستوى اخر.. والتغطية هذي اقصى شيء ممكن تنفع فيه تشغلك طائرة تصوير Drones فانتوم فيها GoPro مسافة 3-5km وكانك ما تحكمت في الطائرة كويس ومش حاط فيها configuration الرجوع… ضاعت عليك وراح طيح وتخسر حقها

رجاءا الموضوع تقني ومش،سياسي او عسكري اي نقاش خارج اطار التقمية والوعي فجزاءه الحظر… حافظوا على ممتلكات بلادك والانترنت والخدمات لاننا يوم نفقدوها مش راح يجي اي اجنبي يركبلنا لا 4G ولا حتى خط ارضي.

#الوعي_التقني_للجميع