نظرية المؤامرة
نزيف المجهود والطاقة والتركيز والنقاشات المشتتة العقيمة، نفس الشيء صايرلي في قطاع الاتصالات والوعي.
الخبر على سبيل المثال:
لقد تم صيانة برج معطل لشركة #LTT في منطقة وادي الربيع ونتمنى الافضل لشركة مستقبلا.
شركاتالاتصالاتالليبية
واحنا خيره ما يديرولنا تغطية في السراج، يرد عليه واحد ماهو في عصابة غادي، يخش واحد ثاني… هذا ما فالحين تركبوا في طرابلس وسكان القرى والجنوب مهمشين يا رب تلقوه وتتلقوه، يخش اخر يعلق… وخيرك ما تتكلم على #ليبيانا ولا رشوك وسكتوك،، ليا اسبوعين ما شفتك تكلمت على #المدارالجديد ولا حصلت فيها تعيين بعد كنت تبتز فيهم وتضحك عليهم وداير حملة عليهم، اصلا كله منكم كانكم خليتوا محمد القذافي خير… حسبي الله ونعم الوكيل سرقتوا البلاد وانت دافع عليهم وبدليل اهو توا منزل خبر كويس والمفروض تسبهم معانا ويجب علينا حرقهم هؤلاء الاوباش، يا جماعة عندي ادلة مادية وكل موظفي شركة LTT تقول امين مستف اموره مع المدير العام الجديد ومواعدينه بمنصب رئيس مجلس مدراء القيادة العامة العليا الغير مسبوقة للإتصالات النوعية الاسطورية… تبو بالتريس… الراجل هذا فقشته يخلص من القابضة علشان يشتم وينال #الهيئةالعامةللاتصالاتوالمعلوماتية.
لالا اموره مستفه مع الهيئة بدليل مرر اوراقه وشفته دارلهم زيارتين ولا ثلاثة ودار تخفيض وبيقسم معاهم في الحصة.. وجتني اثباتات حقيقة على ذلك.. تي اسكتوا مش طلع يبي يجيب شركة فودافون ويبي ياخذ عمولة… خزي عليه سرق البلاد ويجري على ظهور الناس،،، ويستغل في جهل الناس وعنده اجندة خفية ويمرر في اعتمادات وسياسات خفية لدول اجنبية… لالالا هذا جاهل وفارغ خوذوها مني بالتريس.. تي خوذ مني الرسمي هذا يهبر توا ويشنكش في الامور ومربط صح… وقالوله جيب وراقي شركة ونطلعولك اعتماد بمليون غير دافع علينا واشتم هاتف ليبيا والبريد… تي لا يا جماعة هذا وصولي وطالب شهرة وقد نالها حسبي الله ونعم الوكيل فيك عما اقترفت…. وخيرك ما تتكلم على الضي اهم بدل ما تكون انسان مكسد… ضاعت الشهامة الناس تموت وحرب وهو يدور في نت… وغيره وغيره وغيره وغيره
😂😂😂😂😂😂😂
الغريب ان البرج اللي على اساس تمت صيانته طلع مش لشركة LTT وانا غلطت وطلع المكان غلط وطلع خبر خاطئ…
وهذي العقلية الكونانية المخابراتية بامتياز…
هذا فعليا وحرفيا ما اتعرض له يوميا عقب كل منشور…
منشور مستوحى من منشور الخال ابراهيم عن سيولة وكالة مصرف التجارة والتنمية في اوجلة..
نص المنشور في التعليقات
