25,000,000,000
25 مليار مرتبات للدولة الليبية سنوي
لو نقسموهم على 6.5 مليون
يعني كل ليبي ياخذ في 3846 دينار في السنة
وشكرن…. شكرن مكتوبة صح بالنون… بتشدلي في النون ومسيب كل الكلام اللي فوق
تعديل 1:
– احسبها كيف تحب كل الحسابات راح تطلع غلط والرقم مخيف..
عدد الموظفين كان على الكلام الرسمي 1.76مليون وبالندب والتعدد والازدواجيات يوصلوا 2-2.5 مليون
– عدد السكان وفق مخصص ارباب الاسر 7.6 مليون
– القيمة المخصصة للمرتبات 21 مليون بالتنمية والطوارئ الخ 25
– احسبها كيف ما يريحك مش انا اللي غالط… سيبت كل شيء وشدتني انا اللي غالط.. افتح الالة الحاسبة
تعديل 2:
السنة = 12 شهر
تعديل 3:
احسبها كيف تحب مش شرط انا غالط او انت غالط.. هكي اجتهاد وكل واحد عنده الة حاسبة وفي وزارة مالية وعمل واقتصاد وحكومة وانا فتحت الة حاسبة وسكرت مش محاسب
تكسد تفتح الالة الحاسبة وانت تسخن في القهوة على النار وتحسب حسبة تبعيدية مش تقريبية كان صح التعبير تلقى الصفحات تنقل منك
راهو انا مش مشهور ولا طالب شهرة انا مكسد في صفحتي العامة ونكتب في التقنية وفي اربعين بوست مفيد في التقنية والوعي اهم من بوست المرتبات
وشكرن… تبي تعرف ليش بالنون ارجع للبوست اللي قبلها
وشكرن راهي مش شكرنا
تعديل 1:
وهي في الاخير خاطرة
وطلع في تشابه بينها وبين بعض الخواطر من صفحات اخرى بس ما انتشرت الا لما خطرت على بالي 
وشكرن زازيلا
توا صار موضوع…
انا متاكد اني سيبت اللاب توب بعد عدد من الايميلات ووقفت على الغاز وحطيت القهوة وقعدت نكتب في البوست وقلت نقسم الدخل على عدد السكان..
ومتاكد ان الفكرة وليدة اللحظة ومن سنين ما شفتها…
نزلتها في بوست وقعدت نظيف عليها في تعديلات مثلا سنويا او تعديلات ارقام حقيقية بناءا على التعليقات
في شباب قالوا ان منشورة من ايام في صفحات… وفعلا الموضوع مقارب بعد ما بحثت انا عليها..
توا هكي هل انا نعتبر منتهك ملكية فكرية؟
هل هي توارد خواطر علما انها خاطرة؟
هل في حقوق ملكية فكرية على الخاطرة؟
طيب انا كيف جتني الفكرة هل ممكن وانا ندير في scrolling للفيسبوك عقلي الباطن خزنها ودارها ليا وميض وانا نعد في القهوة بناءا على الدخل الليبي؟
طيب مثلا انا كتبت مقالة عن wordpress مدير ادارة المحتوى للمواقع وفي عشرة الالاف انسان كتبوا نفس المقالة ونفس خطوطها هل هي خاطرة ام مقالة والى اي مدى تحفظ الحقوق؟
طيب ماهو معدل الاقتباس المسموح به في الابحاث العلمية والمقالات العلمية؟
موضوع لنقاش ويا ريت نشوفوا نقاش هادف بناء… واللي مش حابب النقاش يدير unlike للصفحة 
وشكرن زازيلا = شكراً جزيلا بس حبيتها