الوضع على هذا الحال ماشي لشيء مشابهة لوضع الشركة العامة للكهرباء…
كل واحد نفسي نفسي…
معاش حد يحصل تغطية وكلها تشوش على بعض…
وتقول ما عنديش تغطية وتقعد تسب في #شركات_الاتصالات_الليبية
انت احسبها بالدولار وقسمها….
اللي صاير ما يرضي حد واعتبروني ما نفهمش وكلما زادت هذه المعدات كلما اختفت التغطية..
وهذا مش راح نقولوا ان الجيران كسروها ولا جوك الداخلية وكسروها…
شوي وعي ونعبروها
وللعلم كل الشركات محددة الاجهزة بتع التقوية اللي مسببة تشويش او اعادة تقوية ضارة
بخصوص موضوع تقوية التغطية وشراء اجهزة الريبتر Repeater المقلدة… Booster او اعادة البث
تعبت وانا نقول راهي تشتغل تشويش ولو تبي حاجة كويسة لازم تاخذ المعدة او الاجهزة والترددات والاعدادات من الشركات “ادارة الفنية”….
ليش متعبنا ومتعب روحك
في وثيقة سرية يوجد اكثر من 200 جهاز تشويش “اعادة بث” في مصراته واكثر من 170 في طرابلس وتاثر سلبا على اداء التغطية…
وعدد قليل جدا أصلي ومعتمد،،، وادارة الفنية في الشركات معتمداته…
معناها اللي يبي يركب يولع سيارته لمقر الشركة وياخذ نوعية الاجهزة ومكان شراءها او الشركات تفتح باب نشر الاجهزة المعتمدة…. كل هذه التفاصيل تلقاهم عند الادارة الفنية…
ولا اسالهم هل كلامي هذا مزبوط ولا لا…
قرار منع استيراد وتركيب هذه المعدات موجود ليه اسبوع.. وفي مراسلات ليها شهور…
ما تكلف روحك فلوس علشان تلقى قدامك محضر في النيابة لمخالفة قانون الاتصالات..
تبي الصح دير الصح كامل… مش تاخذ الصيني وتفلق شوارع وضر المناطق…
كلام العواطف وان الناس تتألم والوضع سيء مش راح يدير حل انما تبرير لمشكلة وزيادة مشكلة…
هذا المنطق…
كلمت ليبيانا والمدار “الفنية” قالوا المواطنين مش مخلينا ننصبوا ابراج فوق المنازل وبجنب المنازل ويعيط يبي تغطية… طيب والحل… نبي تغطية بدون ما تركبوا ابراج… ومش راح نذكر مناطق…
زي ما ننزلوا في الشركات… شوي وعي… من الجمهور… والا مصير الشركة العامة للكهرباء جاي ومش راح تلقى اي شماعة تعلق فيها فشلنا جميع الا نظرية المؤامرة