عيش لروحك ومصلحتك لنفسك

 

كلامي نكتب فيه بكل عفوية

بدون اي تكلف.. بدون اي تفكير… واحيانا كثير حتى بدون مراجعة. وبكثير من الاخطاء الاملائية والمطبعية.

 

وخطر في بالي خاطرة بعد ما شفت مقطع عابر على ناس يخبطوا في بعض بالاسلحة ويحرقوا في سيارات وناس تحرض على بعضها

حسيته مجهود وطاقة ضخمة ضائعة… شباب يجري في الصحاري بدل ما يشوف بلاده ويدير مغامرات ويصور فيدوات او يزرع او يعمر او يبني مدن وشركات ويجيب وكالات..

 

فكر من روحك… وما تاخذني مثال او تاخذ مدير شركة او زعيم عصابة او مليونير او حتى قريب

فكر تكون انت المثال لروحك… انت تمر توا باصعب الظروف ومعاك حق تنقص معنوياتك وتحس بالاحباط بس نؤكدلك ان ما توفر لك اليوم لم يتوفر لنا ولأي شخص سابق من القدرة على التعلم

 

ليبيا اليوم من أسوأ البلدان في التعليم… وخوذها مني ما تعبى على حد لا وزير تعليم ولا قيادة دولة ولا صناع قرار… والله ما عندهم حاجة ولا خطة لاصلاح التعليم….

اعتمد بس على نفس وعلى self study & self learning التعليم الذاتي…

مرات نتألم على الوقت الضائع ان نشوف سياسي او اقتصادي او محلل او تيار سياسي وهو يكذب…. بس انا نشوف فيه ساعة او نص ساعة في الاسبوع… طيب انت.. المفروض تتألم على عشرات الساعات اللي ضيع هكي بين متابعة الاخبار كر وفر وضرب وهرب ودحرناهم وتم الدعس ((شن استفدت، شن علاقتك، شن فادوك، ليش تسمع في ذات الخبر عشر سنوات)) اعتقد كفاية…

 

باستمرار نفكر كيف نستغل وقتي وما نكون فاضي حتى لو حاجة يشوفوا فيها العالم كله تافه مثل ان اسمع موسيقى او نكتب مقال او نصمم فيديو مجانا لجمعية خيرية او نقرا او حتى نتابع حاجة مفيدة.. نذكر في شخص اسمه محمد عياد يشتغل مدير التطوير والمدير التقني في انجح شركات ليبيا “العنكبوت الليبي” يقول : “الحمدلله اني مش فاضي.. وهذي نعمة يا امين.. اني مدام نشتغل فانا نقدم في حاجة..”

 

عبي وقتك:

اتفرج على مسلسلات امريكية,, اتفرج على وثائقيات

اتفرج على نخبة الافلام

اقرا كتب.. نظف سيارتك… اوصل رحمك… رتب نقالك… اشري ميموري… تعلم انجليزي تعلم انجليزي تعلم انجليزي learn English عبي وقتك

 

وتذكر دائما نفسك ان لم تشغلها بالحق شغلتك بالباطل… واللي صاير توا على الفيسبوك باطل وما تجري وراهم

 

اشتغل على حاجة…. امشي بلغ الكرة الارضية انك حي… مش انك تحرض… ولا تنادي بالحرية… ممكن ما نكون فاهم خطاب الحرية… بس بالمناسبة قلة بسيطة جدا في المجتمعات الغربية والعالم الاول ينادوا بالحرية والاغلبية عايشينها صح.. عايشينها ان يديروا في مغامرات في البراري والصحاري والانهار والبحار والطيارات ويخدموا ويتعلموا ويسافروا… خذ مثلا رحاليستا… خلال سنتين نعتبره من الانجح على الاطلاق

محمد السليني: يدير في حاجة يحبها

يسافر… عايش حياتها… عنده صحاب في كل مكان… عنده قضية ورسالة… مفيد… يفكر صح… وانسان ضحكته من الطق لطق 😁😁😁اكبر ضحكة فيك يا شمال افريقيا… صاحبي محمد ومش راح يزعل..

 

انا درت ولفيت وشفت وانخبطت وخسرت مبالغ فلكية ونصبوا عليا وضحكوا عليا برضاى ورغما عني… ومع ذلك وقفت وقلت كلمة وحدة “مصلحتي في امين”

 

قعدت نلف في شوارع طرابلس مسافات هائلة ونقول المعنويات فووووووووووووق ونسمع في موسيقى Yanni وسعيد جدا ولا املك ثمن العربية اللي اندور بيها اساسا.. 2015

 

لكن مع الايام وبلوكة على بلوك وربع على ربع ومية على مية كبرت وقلت مساري التعليمي مش راح يوقف وقعدت نخش كورسات واللي مش موجود على النت نزله ونتعلمه…. وفتحت موقع مدونتي وقعدت سنتين نطور فيه لعند اصبح من الخلف منصة ضخمة…. وكان قدوتي ولازال مراد بوستة blogofapps…. الراجل هذا يشوف لروحه ولاهي لروحه وعنده اسم في العالم والخليج ومصر وليببا…. ويخوف في شركات ضخمة في ليبيا وبرا….

 

خليك من بقايا المجتمع اللي بيقولوا عليك… هرواك… وفاضي… ووهمي… وهلبة كلام انقالي وانقال على غيري…

 

والله مصلحتك في روحك ونفسك

 

امس اثرت فيا قائمة المؤثرين بالمحتوى المفيد في ليبيا وتقريبا فيها 40…من اصل ستة مليون..

الذي اثر فيا فعلا وبشكل كبير ان الاربعين شخص هم نخبة اصدقائي على الفيسبوك… وهذا مؤشر بلغني اني ماشي صح…

https://m.facebook.com/story.php?story_fbid=823463544706419&id=100011283426869

 

دير نادي النخبة الخاص بيك وعيش انت وعيش لروحك ولعائلتك وحياتك ومستقبلك

 

وحتى الخاطرة الجاية امين صالح يقوللكم خلو معنوياتكم فوووووووق✌🏻️✌🏻️✌🏻️✌🏻️✌🏻️